7 TYLLI KI NONGRIM JONG KA INDIAN PRIVACY CODE

Kaei kata ka Privacy Code? Kiei kita ki 7 tylli ki nongrim?

Ka Ri India kam pat don ia ka Privacy Law ne ka Ain ka ban iada ia ka hok jong ki nongshong shnong ban im ka jingim kaba jar jar bad ban im laitluid ha la ka pyrthei kaba shimet shimet. Kumta ngi donkam mardor ia kane ka Ain bad ka #SaveOurPrivacy Campaign ka kynhun kaba iakhun na ka bynta ban ioh ia kane ka hok ka la pruid dak bad thoh ia ka Indian Privacy Code 2018 ne ka Ain ka ban iada ia ka hok jong ngi ban im jar jar bad im laitluid ha la ka pyrthei ba shimet shimet. Ki 7 tylli ki nongrim jong ka Indian Privacy Code kin iarap ia ngi ban sngewthuh khambha ia ka jingdonkam ia ka Ain ka ban iada ia ki jingtip ba la lum thup shaphang ka jingim jong ngi shimet, ki kam syntiat, ki kam sngap siar bad kiwei kiba ktah ia ka jingim ba jar jar bad jinglaitluid ba shimet shimet jong ngi. Niuma, ka Indian Privacy Code kam pat dei ka Ain, ka dei tang ka jingpruid dak bad kumta ngi khot ia phi ki nongshong shnong ban ia pashat jingmut lem, ban iatai nia halor kane ka Ain bad ban sam lem ia ki buit bad ki jingstad jingshem phang ba kordor jong phi khnang ba ngin lah ban ioh ia ka Ain kaba khlain. Ka jingiatai halor kane kan dei hi halor ki nongrim kiba skhem kiba don ha ka Riti Synshar ka Ri bad kiwei de ki jingbatai ne jingthoh jong ki riewstad ha kane ka phang. Phi lah ban shem ia ka draft Indian Privacy Code 2018 ha ka website saveourprivacy.

Sa shisien la pynkynmaw ba ka Indian Privacy Code 2018 kam pat dei ka Ain hynrei ka lah ban long ka Ain pura bad kaba khlain hadien ba la iatai bniah halor ki 7 tylli ki nongrim ba la ai kumne harum:

Kumno Kine ki 7 Tylli ki Nongrim ki Mih Pyrthei?

Ki 7 tylli ki nongrim ki mih hadien ka jingiatai kaba bniah bad sani bha. La pule bad peit bniah ruh ia ki Ain kiba treikam kylleng ka pyrthei bad kumno lah ban shim kylliang bad pyntreikam ha India. Nangta, la peit bad pule bniah ruh ia ka Privacy (Protection) Bill 2013 kaba la pynwandur hadien shibun kylla ki jingiatai nia ba la pynlong da ka Centre for Internet Society, Bangalore. Ym tang katta, la iathir ruh katkum ki kaiphot jong u Justice A.P Shah Committee of Experts bad kiwei de ki jingai jingmut jong ki nongiasaid ain bapher bapher kiba la ai jingthoh sha ka Justice Srikrishna Committee of Experts.

Ka Indian Privacy Code 2018 ka dei ruh ka jingkyllum lang ia ki rai bapher bapher jong ka Supreme Court halor kane ka phang, kaba kynthup ia ka rai kaba dang shen halor ka case jong U Justice K.S Puttaswamy pyrshah ia ka Union of India ne Sorkar India (2017) bad la shim lang ia ki mat kiba bha tam kiba lah ban shem ha ka Ain kaba la pyntreikam ha dewbah Europe, kata ka General Data Protection Regulation. Ka Indian Privacy Code ka kren shai ruh ba ki nongshong shnong ki dei ban don ka hok ban tip bad sngewthuh ia kiei kiei kiba ki shem shitom ban sngewthuh kum ka “algorithmic decision making” bad ka “black box system”. Ka algorithm ka dei ka rukom khein jingkhein jong ka stad saian computer kaba iasnoh ruh bad ki jingtip ba la lum thup bad kumno la pyniaid bad pyndonkam ia ki jingtip ba la lum. Kumta ngi donkam ban tip bad sngewthuh kumno la lum bad pyndonkam ia ki jingtip ba la lum thup shaphang ka jingim jong ngi shimet shimet. Katba ka “black box system” pat ka dei kata ka rukom treikam jong ka computer ka bym lah ban pynshai. Namarkata ka daw ha kane ka juk stad saian computer ngi donkam ia ka Privacy Law ne ka Ain ka ban ai jingshai bad ai jingiada ia ngi ki nongshong shnong na ka jingshah ialam bakla bad shah pyndonkam bakla ia ki jingtip ba kongsan jong ka jingim ba shimet jong ngi.

Ki 7 Tylli Ki Nongrim Ka Indian Privacy Code:

Nongrim ba 1

Ki hok ba shimet shimet jong ki nongshong shnong ki dei ban long ka pdeng jong ka Ain kaba iada ia ka hok ban im jar jar bad laitluid ha la ka pyrthei ba shimet shimet.

  1. U/ka riewshimet bad ki hok jong ki ki dei kiba kongsan tam ban ioh ka jingiada. Ka Ain kaba iada ia ka jingim ba jar jar ka dei ban pynkup bor ia phi da kaba pynskhem ia ka hok ban im jar jar bad laitluid ha la ka pyrthei ba shimet shimet. Kane ka kynthup ia ka hok ban im ka jingim kaba don dor bad kaba lah ban synshar laitluid da lade ia lade.
  2. Ka dei ka kamram kaba ha khmat eh ban iada ia ka jingim ba jar jar bad ba laitluid jong phi shimet shimet.

Nongrim ba 2

Ka Ain kaba iada ia ki jingtip ba la lumthup shaphang jong phi ka dei ban shong nongrim halor ki nongrim jong ka hok ban im jar jar bad laitluid ha la ka pyrthei ba shimet shimet.

  1. Ki mat ba la kdew da ka Justice A.P Shah Committee of Experts halor ka jingpyndonkam ia ki jingtip ba la lum thup ki long kiba kongsan eh ban kynthup ha ka Ain iada ia ka hok ban im ka jingim ba jar jar bad laitluid ha la ka pyrthei ba shimet shimet.
  2. Ka Ain iada ia ka hok ban im jar jar bad laitluid ha la ka pyrthei ba shimet shimet ka dei ban san ryngkat bad ka jingroi jong ka stad saian bad technoloji bad ka dei ruh ban san bad kiwei de ki ain kiba bha kiba treikam ha kylleng ka pyrthei. Niuma, ka ain iada ia ka hok ban im jar jar bad laitluid ha la ka pyrthei ba shimet shimet ka dei ban long katkum ka rai jong ka Supreme Court halor ka Right to Privacy da kaba shim kylliang ruh na ka ain General Data Protection Regulation kaba la treikam ha ka dewbah Europe.
  3. Hooid, kano kano ka Ain ka donkam ban treikam laitluid khlem da shah bnoh ha kiwei pat ki kyndon. Kumta donkam ban batai shai bad bniah ia kita ki kyndon ba laitluid ha ka ain kumne (a) ban kdew bad thoh da ki kyntien kiba shai, ym ban shu thoh kyllum ne thoh kyllain (b) dei ban don ki jingthmu kiba shai kdar bad kiba thikna bad dei ban pyntreikam pyrkhing thik tang na ka bynta kita bad (k) dei ban don ki lad jingiada ba paka haba pyntreikam ia ki.

Nongrim ba 3

Ban thung ia ka Privacy Commission ne ka tnat treikam ba kyrpang ban pyntreikam ia ki Nongrim jong ka hok ban im ka jingim ba jar jar bad ba laitluid ha la ka pyrthei ba shimet shimet.

  1. Ngi donkam ka tnat treikam kaba khlain ban pynthikna ba ia ka hok ban iada ia ki jingtip ba la lumthup shaphang jong ngi la pyntreikam katkum ka Ain. Na ka bynta kane ngi tyrwa ban don ka tnat treikam kaba khlain bad ba laitluid ne Privacy Commission. Ngi la pyrshang ruh ban pruid dak ia ka dur jong ka katkum ki nongrim kiba lah ban treikam.
  2. Ka Privacy Commission kan don ka bor kaba iar ban tohkit, ban bishar, ban shna ki kyndon bad ruh ka bor ban pyntreikam ia ki kyndon. Ka Privacy Commission kan don ka bor ban pan kaiphot bad pan jingkhein na ki nongpyndonkam ia ki thup lum jingtip jong ki briew bad ka bor ban pynshitom ia kino kino kiba pynkhein ia ka ain bad ki kyndon.
  3. Kawei ka jingeh ka long ba ki don ki ain kiba iadei bad ka stad saian bad technoloji ki shim por ban treikam bad ki kylla rim noh namar ka jingkylla stet bad jingiaid shaphrang ka stad saian bad technoloji. Kumta ban pynthikna ba ki ain bad kyndon kiba iada ia ka hok ban im jar jar bad laitluid ha la ka pyrthei ba shimet shimet ngi tyrwa ban pynkup bor ia ka Privacy Commission ban thaw ne pynkylla ia ki kyndon katkum ki jingkylla kiba mih khnang ban pynkhlain ia ka ain bad pynskhem ia ka jingteh lakam.
  4. Khnang ba ka Ain bad ki kyndon ki lah ban pynurlong ia ki nongrim bad ki lah ban iada ia phi, baroh ki kyndon hapoh ka ain dei pynwandur da kaba iatai bad iathir lang da ki nongshong shnong. Kane kan iarap ia ka Privacy Commission ban shemphang bad tip ia ki jingkylla bad jingiaid shaphrang ka stad saian bad technoloji bad ban lah ban pyntreikam kham bha ia ki jingthmu jong ka Ain.
  5. Ki nongshong shnong ki dei ban don ka hok ban ujor pyrshah ha ka Privacy Commission lada jia ba don ka jingpynkhein ia ka Ain bad ia ka hok ban im ka jingim ba jar jar bad ba lalitluid ha la ka pyrthei ba shimet shimet. Ka Privacy Commission ka dei ban long ka bor kaba lah ban pdiang ia ki jingujor bad ban weng ia ki jingeh ba ki briew ki iakynduh. Ka dei ruh ban don ka bor ban tohkit laitluid, ban bishar ,ban hukum bad pynshitom ia kiba pynkhein ia ka ain bad ka hok jong ki briew.
  6. Ki dwar jong ki iingshari ki dei ban plie ia ki briew. Katba ka Privacy Commission ka lah ban pdiang ia ki jingujor, ki nongshong shnong ki dei ban bat ia ka hok ban wad ia ka jingiarap na ki iingshari bad ban ujor ha ki tnat pulit.

Nongrim ba 4

Ka Sorkar ka dei ban burom ia ka Ain bad ki Kyndon haba ka lum jingtip bad pyndonkam ia ka thup lum jingtip jong ki briew.

  1. Ka Sorkar ka don ka bor bad ka jingtip shaphang ki nongshong shnong ka Ri India. Kumta ka don ruh ia ka jingkitkhlieh bad ka bor ban peit ba ym dei ban pyndonkam bakla ia ki jingtip shaphang ki briew shimet. Ka long kaba donkam namarkata ia ka sorkar bad ki tnat treikam ne kino kino ki bor ne kynhun treikam ban bud pyrkhing ia ka Ain bad ki kyndon kiba iada ia ka jingim ba jar jar bad ba laitluid ha la ka pyrthei ba shimet shimet jong ki nongshong shnong. Ngi kyrshan ia ka jingpyndonkam ia ka stad saian bad technoloji namar ka ai shibun ki jingmyntoi ia ki paidbah, tangba kane kam dei da lei lei ruh ban pynduh noh ia ki hok tynrai bad jinglaitluid jong ki nongshong shnong.
  2. Ka Sorkar ka don ka jingkitkhlieh ban pynioh ia ki jingdonkam ha ki nongshong shnong jong ka Ri India. Hynrei kita ki jingdonkam bad jingmyntoi ba ki paidbah ki dei hok ban ioh ym dei satia ban pynduh noh tang na ka daw ba kim mon ban ai ki jingtip shaphang ia lade sha ka Sorkar. Ban pynsangeh ne pynduh ia ki jingmyntoi ba dei ban ai sha ki paidbah tang namar ba ki paidbah kim mon satia ban ai ia ki jingtip shaphang ialade ka dei ka jingthombor. Ym lah ban pynbor ia ki briew ba kin die ia ki jingtip ba kongsan shaphang ialade bad ia ka jinglong nongshong shnong ba pura jong ka Ri ha ka duwan jong ka jingpyndonkam ia ki jingmyntoi ba ioh na ka Sorkar.
  3. Ban pynthikna ba ki nongshong shnong kin ym shah pynbor ka Privacy Commission ka dei ban lah ban tehlakam halor ka Sorkar bad ki tnat treikam jong ka kumba ka long ia ki kynhun ki riew shimet. Ka Privacy Commission ka dei ban don ka bor ban khmih bad peit halor ki ain ki kyndon baroh kiba iadei bad kaba iada ia ki jingtip shaphang ki briew bad ka hok ban im ka jingim ba jar jar.

Nongrim ba 5

Ka Jingiada ia ka hok ban im ka jingim ba jar jar bad ba laitluid ha la ka pyrthei ba shimet shimet ka dei ban iaid ryngkat bad ka jingpynkylla ia ki ain syntiat.

  1. Ka jingpynpaw paidbah u Edward Snowden ka iathuh shai ba ki bor Sorkar ki lum pathar bad pyndonkam ia ki jingtip shaphang ki briew shimet khlem ka jingtip jong ki trai met. Ka Ain ka dei ban khanglad ia kane ka rukom lum jingtip pathar bad ka rukom syntiat ia ki paidabah namar ka long pyrshah ia ka hok longbriew manbriew bad palat ia u pud ki jingdonkam, ka jingthew bad ki jingthmu.
  2. Lada donkam ban syntiat bad ban sngap siar ia ki jingiakren jong u ne ka bad kiwei pat. Dei ban leh phikir bha ia kata bad ka dei ban long kaba shong nia shong ain bad dei ban bud pyrkhing ia ki kyndon. Ban pyntreikam thikna ia kane dei ban don ka tnat treikam kaba peit ia ki jingpynkylla ia ki kam syntiat hapoh ka Privacy Commission bad kano kano ka hukum ban syntiat ne ban sngap siar ka donkam ia ka rai kaba la thew da ki bor jong ka iingshari ha kaba u/ka nongiasaid ain jong u ne ka riewshimet kiba shah ktah ki lah ban iasaid bad iashim bynta.
  3. Kino kino ki sakhi kiba iohlum be-ain, kum ka jingiakren ha ka telephone ne ban kem ne sngap siar ia kita ki jingiakren khlem ka hukum kaba katkum ka ain, yn ym lah ban pdiang ia ki kum ki sakhi ne jingpynshisha ha ka iing bishar. Nangta shuh shuh ban pynthikna ba ka don ka rukom pyntreikam kaba shai ia ki hukum ban syntiat dei ban pyntip sha u ne ka briew kiba shah syntiat.

Nongrim ba 6

Dei ban nang pynkhlain shuh shuh bad iada ia ka Hok ban ioh jingtip ne ka Ain Right to Information.

  1. Baroh shi katta ki nongshong shnong ka Ri India ki la nangioh bor shuh shuh da ka jingdon ka Ain Right to Information ne ka Hok ban ioh jingtip halor ka jingtreikam ka Sorkar bad ki tnat teikam bapher. Da kane ka Ain la lah ban wanrah ia ka rukom treikam kaba shai bad kaba ai jingkhein ha ki kam Sorkar bad kiwei de. Ha kajuh ka por pat, ki kyndon kiba iada ia ka jingim ba jar jar bad ba laitluid ha la ka pyrthei ba shimet shimet kiba la pruid ha ka Ain Right to Information, tangba kiba lah ban pyndem bad pynsynjor na ka bynta ka jingmyntoi lang ki paidbah salonsar ki dei ban neh.
  2. Ki Information Commissioner ne ki khlieh duh kiba la kdew ha ka Ain Right to Information kim dei ban shah tuklar bad shah pyniaid ha ki khlieh duh jong ka Privacy Commission ne ki Privacy Commissioner. Dei ban kdew bad batai shai ha ka Ain ba ki Information Commissioner kim hap hapoh ki Privacy Commissioner bad ba ki lah ban treikam laitluid katkum ba la pynkup bor ia ki da ka Ain.

Nongrim ba 7

Ki Jingiada kylleng ka pyrthei bad ka Jingiamir lang ia ki kyndon ban iada ia ka rukom pyndonkam paidbah satlak ka pyrthei ia ki kor ki bor Internet, ki dei ban don ha ka Ain ne Privacy Code.

  1. Ka Ain Indian Privacy Code 2018 ka dei ban don ka bor shabar u pud u sam ka Ri bad ka dei ruh ban lah ban pyntreikam halor ki rynsan treikam bad ki jingtreikam kiba lum thup ia ka jingtip jong ki nongshong shnong ka Ri India bad kiba treikam ha India.
  2. Ha kajuh ka por dei ban phikir bha ha ka jingpyntreikam khnang ba kan ym ktah pat ia ka jingpyndonkam paidbah satlak ka pyrthei ia ki kor ki bor Internet kiba long ka jingkyrkhu bad jingmyntoi ia ki nongshong shnong ka Ri India khnang ba ki nongshong shnong ki lah ban ioh ia ki jingtip bad ki jingmyntoi ba bun na kylleng ka pyrthei. Kino kino ki jingai jingmut ban pyrkhing ia ka jingpyndonkam paidbah satlak ka pyrthei ia ki kor ki bor Internet ka ban ktah ia ka jingmyntoi ki paidbah nongshong shnong dei ban pyrshah tyngeh.
  3. Ha ka juk ka jingiaid shaphrang ka stad saian bad technoloji bad ka juk ka jinglong kawei ka pyrthei, ka Ain kaba iada ia ki jinglum jingtip shaphang ki briew bad nongshong shnong ka dei ban iada ia baroh ha kylleng satlak ka pyrrthei bad ka dei ban don ka jingiamir jingmut kaba shai bad ba bniah hapdeng ki Ri ka pyrthei kumno ban pyntreikam bad iada ia ka jingim ba shimet shimet, ba jar jar bad ba laitluid jong ki nongshong shnong.

 

Ia kitei ki 7 tylli ki nongrim la pynmih da ka SaveOurPrivacy Campaign bad la pynmih paidbah ruh ia ka draft Indian Privacy Code 2018.

La pynwan sha ka khasi da Rev Kyrsoibor Pyrtuh

Raiot

Subscribe to RAIOT via Email

Enter your email address to subscribe to this blog and receive notifications of new posts by email.

Join 15.7K other subscribers
Kyrsoibor Pyrtuh Written by:

Kyrsoibor Pyrtuh is a pastor interested in intersection between theology and social power

Be First to Comment

Leave a Reply