Ïathuh Ia Nga

Nga la thngan bad phi la bsa ia nga, nga la sliang bad phi la ai jingdih ia nga; nga la long u nongwei bad phi la pdiang sngewbha ia nga ha ki Ïing jong phi, nga la lyngkhuit bad phi la pynkup jaiῆ ia nga; nga la pang bad phi la shim ban sumar ia nga…” (Mathaios 25:35-36)

Ki kyntien jingkyrmen ba ngin puson ha kane ka sngi ki long ha ka dur jong ka poitri kaba nga la pruid saw snem mynshuwa ha ka por jong ka jingiakhun bad ka jingpang bampong. Kane kam dei ka jingthoh poitri kaba janai bad ym lah ban Ïanujor ia ka bad kiwei pat. Kane ka dei tang ka jingpruid halor ka jingshem bad jingiohi , tangba lah lehse ban Ïasam ia ka kum ka khubor ha kane ka por.

Ha shuwa ban Ïasam bad phi ki nongpule ba ieid ia kata ka jingthoh poitri kaba la nam Ïathuh Ia Nga, nga sngewdei ruh ban ai shi symboh ka mat puson na ka Gospel katkum u Mathaios 25:35-36 kum ka jinglamphrang.

Ha ka Gospel u Mathaios 25:35-36, u Jisu u kdew bad ban jur ia ki jingdonkam ba tynrai duh jong ka longbriew manbriew. Lah ban kdew hangne ia ki hynriew tylli ki jingdonkam ba tynrai duh jong ka jingim u briew bad kita ki long;
(i) ka bam ka sa, ka kamai kajih
(ii) ka umbam umdih
(iii) ka Ïing ka sem
(iv) ka jaiῆ ka nep
(v) ka koit ka khiah bad
(vi) ka jinglaitluid.
U Jisu u kdew shai ba kine ki dei ki jingdonkam ba tynrai duh kiba uwei pa uwei u briew bad kawei pa kawei ka briew ki dei ban ioh. Lada kim ioh ka jingim jong ki kam pat long kaba pura bad kam long katkum ka saiῆdur blei. Ka dei ka nongkynti jong uwei pa uwei bad kawei pa kawei ban ioh ia ka jingim ba pura. Lada u briew ne ka briew kim lah ban ioh ia ka jingim ba pura ne ia ki jingdonkam ba tynrai duh jong ka longbriew manbriew, kata ka mut ka don ka jinglah shilliang ne jingleh shilliang khmat bad la don mano re mano kiba tuh ne knieh noh ia ka hok bad nongkynti jong ki.

Kane ka juk kaba ngi im mynta kam dei ka Ïa kaba kut jong ka pyrthei, hynrei ka dei ka por kaba eh, kaba jwat bad kumta ngi dei ban khlaiῆ, ban skhem jingmut bad ban shlur mynsiem. Ha ka Gospel u Mathaios 25:35-36, u Jisu u kob bad kdew ha kiba ngeit bad ka Balang ia ka nongrim jong ka jingbishar ha akher ka sngi. Ha ka jingbishar ba khatduh, U Blei un bishar bad thew tarajur ia ka pyrthei, ia ka imlang sahlang bad ia u khun bynriew da kane ka nongrim. Nalor nangta, ha kane ka bynta u Trai Jisu u tynjuh ia ka jingieid bad jingngeit jong ngi. Katkum u Jisu, ka jingieid ia u Blei bad ia ki para briew ka dei ban paw da ki kam, ym tang da ka ktien bad kumjuh ruh ka jingngeit kaba im bad ba seisoh ka dei ban paw ha ki kam.

Katkum ki riewstad, ka bam ka sa, ka kamai kajih da ka umsyep ka dei ka burom ka ijot jong ka longbriew manbriew ha ka imlang sahlang.Lada ym biang ka kamai kajih ne ka bam ka sa bad hap ban shu khrong, ki briew kin duh noh ia ka burom ka ijot ka longbriew manbriew, ki kylla long noh ki mraw jong kito kiba bsa jingbam ia ki. Kumta ki jemrngiew. Nangta ka umbam  umdih ka long kaba kongsan bad da ki million ngut ki briew ki shem jynjar bad ki iap namar ba kim ioh ka umbam umdih ba biang.  Ka Ïing ban shong ban sah bad rieh tngen ka dei ka jingdonkam ba kongsan. Ki briew kim dei ban shu im bad iathiah-iadem ha lynti ha syngkien ne ha ki jaka bret niut ne ha ki khrum jingkieng ne ha ki rud dukan bad ki phetwir ruh ki dei ban ioh ka jaka shong jaka sah kaba biang. Uwei pa uwei u briew bad kawei pa kawei ka briew ki dei hok ban ioh ka Ïing ne ka trep ba paka ban thiah ban dem bad ban pynheh pynsan ia ki khun ki kti. Ka jaiῆ ban kup, ban phong bad ban sem ka dei ka hok ban iada na ka raiῆ ka rem. Ka jingkoit jingkhiah jong ki briew, ka jinglah ban pynbiang ia ki lad jingsumar pang kiba bha bad ba jem dor na ka bynta baroh ki nongshong shnong ki dei ki jingkdew kiba kongsan kiba pynpaw ia ka jingroi bad jingsan ha ka imlang sahlang.

Phewse ha ka juk “neo-liberal era” kaba ngi im mynta, ka juk kaba lah shilliang bad leh shilliang khmat, ka pyrthei bad ki bor synshar ki tuh bad knieh noh ia ki jingdonkam ba tynrai duh na ki briew. Kumta u khun bynriew u ud, u nam, u bynῆiaw bad u pyrta, Ïathuh Ia Nga-

Ïathuh ia nga
Katno ka bai khaw bai doh?
Ka tlang shuti bai skul shuwa ngin klet noh.

Ïathuh ia nga
Katno ka bai Ïing ban shong?
Katno ka bai jaiῆ ban phong?
Katno ka bai kup bai sem?
Ban da na ka raiῆ ka rem.

Ïathuh ia nga
Ka tlang mynta, katno ka bai ding ka bai rnga?
Ban lait na ka khriat, ka dait thah sangam.

Ïathuh ia nga
Bad ha shuwa ban Ïathuh
Kawei ka jingkylli ngan buh,
Katno ka dor ka koit ka khiah, katno ka dor ka sumar pang?
Ka kamai shi rta jingim,
Kam lah ban pyndap ia ka bai sumar bad bai dawai-dashin.

Ïathuh ia nga
Ka pang ka jhia, ban sa ka duk,
Jingim ka syrtok bad kordit tasam.

Ïathuh ia nga
Haba pang ba jhia
Jingdon jingem, ba la kynshew.
Ka ksiar, rupa ne khyndew
Haba wad jingpynkhiah, la hap ban bynda.

Ïathuh ia nga
Jingim ba pura bad ba dap kyrhai
Mano ban ai?
Jingim ba baroh ki ioh ka hok,
Ban trei ban ktah,
Ban koit ban khiah,
Ban nang ban stad,
Ka dei ka thong bad jingangnud.
Bad ka jingiakhun ba dang sah.

Ka por ka khot bad dawa ia ngi ban im sngi ban iakhun bad ialeh. Ka jingim kaba iakhun ka dei ka jingim kaba sngewtynnad bad ngin Ïeng haduh kaba kut. Ha akher ka sngi haba ngi Ïeng hakhmat ka jingbishar ba khatduh yn sa ong shaphang jong ngi kumne-

“…Nga ong ha phi, ba man ba phi leh ia kane na ka bynta uno uno uba rit tam na kine ki dkhot jong ka longÏing jong nga, phi leh ia kane na ka bynta jong nga

Amen

Raiot

Subscribe to RAIOT via Email

Enter your email address to subscribe to this blog and receive notifications of new posts by email.

Join 15.7K other subscribers

Kyrsoibor Pyrtuh is a pastor interested in intersection between theology and social power

Be First to Comment

Leave a Reply