Ka Khubor Good Friday Ha Ki Sngi Ka Khlam Corona

Phi lah ban sngap bad pule ia ka Sermon U Rev. Kyrsoibor Pyrtuh da kaba phi klik hangne

Ka Khubor Good Friday Ha Ki Sngi Ka Khlam Corona: Ka Gospel Ha Ka Pyrthei Ba Ud Jynjar Sat

Ka jingkhot sha ka jingpuson

 

Paralok baroh, nga wan sha phi na ka Kremlyn Sound Studio ban ia kynmaw lang bad phi ia ka Good Friday bad ryngkat ki jingduwai nga ai khublei ia phi baroh kiba sngap ia kane.

Ngi im ha ki sngi ka khlam corona bad ka long ka por kaba jynjar sat. Ka khlam corona ka wan ha ka aiom kaba ngi kynmaw ia ka Good Friday- ka sngi ka jingshah shitom bad ka jingiap U Jisu Khrist, ka wan ruh ha ka aiom ba ngi rakhe ia ka Easter Sunday- ka sngi ka jingmihpat, ka sngi ka jingjop jong ka jingim halor ka jingiap.

Kane ka khlam corona ka wan ha ka aiom pyrem- ka aiom jong ka jingsdang thymmai jong ka jingim, ka aiom jong ka jingim kaba thymmai. Ka aiom kaba syiad bad kaba im hadien ka tlang kaba dait thah bad kaba iap.

Kane ka khlam ka la shim noh ia ki hajar bad ki phew hajar ngut ki mynsiem satlak ka pyrthei kat shaba ka la saphriang.

Kane ka khlam ka la khang bad pynsangeh lut ia ka trei ka ktah, ia ka iaid ka ieng bad ia ka jingim baroh kawei. Ngi shong khop bad ngi set ialade hapoh iing. Kane ka jingshong iing bad ka jingsangeh treikam jong ngi kam dei ba ngi shongthait ne ba ngi shong jahthait ba ngi ioh shuti- Em kam dei kumta. Ngi shong khop ha la iing ban iada ialade na ka jinglynshop ka khlam bad ngi shong ha la iing ryngkat bad ka jinglynga, ka jingdukha bad ka jingjynjar mynsiem. Ngim tip lano kane kan wai?

Kane ka Good Friday ba mynta kam don ia ka Easter Sunday kaba thikna.

Ka pyrem ruh ka long kaba suda- kam don ia ka leh kmen ka leh risa, ka lympung shad ka thylli bad ki sur ka ksing, ka nakra bad ki tamgmuri ki kynjah.

U S.J Samartha u riew stad theology shisien u ong [su_quote]ka don ka diengphna ha man la ka jingmihpat, hato ka don mo don ka jingmihpat na ka bynta kawei pa kawei ka diengphna?[/su_quote]

Kane ka khlam corona- hato ka dei mo ka jingpynshitom jong u Blei? Em kam dei ban long kumta. U Blei uba ngi ngeit u dei u Blei jong ka jingieid, ym u Blei jong ka jingbitar. Ka diengphna u Jisu Khrist ka pynkynmaw ia ngi shaphang ka jingieid bad ka jingai ei jong u Blei.

Lano pat ki riewtstad kin shem ia ki dawai bad ki lad jingiada na kane ka khlam? Hato ngin iai ap da ka jingkyrmen ne ngin iai ap ruh khlem ka jingkyrmen? Kumba rwai u myllung T.S Eliot ban iai ap khlem ka jingkyrmen, namar ngi lah ban kyrmen ia kaei kaei ka bymdei.

Ngim don jubab bad ngi shu lynga bad ud jynjar sat kum u nongrwai Salm. U nongrwai Salm ha ka Salm kaba hynriew u ud “Ah Trai, to isynei ia nga! Pynshait bor ia nga, naba nga la lwait shikatdei.”

Bad ha ka Salm kaba shiphew u nongrwai u ud “Balei me don jngai palat, Ah Trai. Balei ba me buhrieh ialade haba ngi don ha ka jynjar?

Ha ka Salm kaba khatlai u kylli ia kine ki jingkylli “Sa katno pat ba men klet ia nga Ah Trai? Hato shi junom?

Bad ha ka Salm kaba ar phew ar u nongrwai Salm u ud “U Blei jong nga u Blei jong nga balei ba me ieh noh ia nga?

Paralok ba ieid, ha kane ka por shuwa ba ngin ioh ia ka khubor Good Friday to ngin ia kynud ia ka jingrwai kaba 274 na ka Khasi Hymn Book ha ryngkat bad kane ka sur jingtem.

Ka Gospel Ha Ka Pyrthei Ba Ud Jynjar Sat

Paralok , ka khubor Good Friday kaba nga don ha kane ka por ka long, “ Ka Gospel ha ka pyrthei kaba ud jynjar sat” bad ngan pule na ka Shithi sha ki Nong Rom 8:22-23

Naba ngi tip…ki jingthaw baroh ki ud da ka jingpang, kum ka jingpang jong ka jingsuhkha…hynrei ym dei tang ki jingthaw kiba ud, ma ngi ruh ngi ud hapoh lade hi

Ka jingthaw, ka jingpynlong baroh kawei bad ma ngi ki khun bynriew ngi ud jynjar sat kumba suh kha-ong ka Baibl.

U Jisu Khrist ha kper Getsamani u duwai bad ud “Ah Blei lada long ka mon jong me to shim noh ia kane ka khuri ka jingshah shitom” Halor diengphna ha shuwa ba un dkut mynsiem ruh u Jisu Khrist u ud, “U Blei jong nga, U Blei jong nga, balei ba Me iehnoh ia nga?

Ka jingud jong u Jisu ka dei ka jingud jong ngi. Ma nga-ma phi ruh ngi ud, ngi lynga, ngi sheptieng bad ngi artatien shikatdei eh .

Ka mariang ruh ka ud, tangba ngim ju sngap ia ka jingud jong ka. Ngi iai bteng ban lehtohmet bad leh beijot ia ka mariang. Ha ba kumne pat hapdeng kane ka khlam corona ngi kyndeh bad ngi khohreh ban pynkhuid ia ki sawdong ki sawkun ki jong ngi. Ngi kwah ba ki um ba ngi dih bad ka lyer kaba ngi ring mynsiem kin long kiba khuid.

Kane ka khlam corona ym tang ba ka ktah ia ka koit ka khiah bad ba ka shim noh ia ka jingim briew. Hynrei kane ka khlam ka la pynjulor ia baroh ki bynta jong ka jingim. Im im peit peit kane ka khlam ka lynthaw bad ka lynsher ia ka jingim jong nga, ia ka jingim jong phi.

Ngi iohi da la ki khmat bad da ki spah ngut ki nongbylla sngi ki iaid da ka kjat ban leit phai sha la iing bad ban phet rieh na kane ka khlam.

Ngi sakhi ruh ia ki doctor ba ki shah suba sniew iohba ki wanrah ia kane ka khlam sha ka jaka kaba ki shong ki sah. Ka la don ruh ka jingkdew kti ia ki nongshong shnong jong ka Ri China. Nangta ka la don ruh ka jingpyrshang ban kynnoh ia ka kynhun niam Muslim ba ki dei ma ki ki nongpynsaphriang ia ka khlam ha kane ka Ri ka jong ngi. Ki samla pule bad ki briew na ka kane ka thain shatei lam mihngi, kiba sah ha kiwei pat ki Jylla jong ka Ri India ma ki ruh ki shah tharai sniew tang na ka daw ba ki iapher ka dur khmat.

Kaei kane? Hato ka dei seh moh ban ia kynnoh bad ban ia kdew kti kumne? Ha kum kane ka por kam dei mo ba ngin iawan lang bad ngin iaienglang ban ia kyrshan bad ban iarap iwei ia iwei pat?

Ka jingim te ka la julor shikatdei eh na kane ka khlam corona. Ha ki por ki ban sa wan ynda haba la plie biang ia ka kamai kajih bad ka iaid ka ieng, kumno kan long ka jingim ka jong nga ka jingim ka jong phi? Katno spah ngut ki ban duh noh ia ki kam ki jam? Katno phew tylli ki jaitkam bad ki jaka treikam ki ban khang khyrdep noh? Katno yn sa khate bad pynhiar ia ka bainong sngi jong ki nongtrei ki nongbylla? Ka rep ka riang kan long kumno? Ka koit ka khiah kan long kumno? Hato kan nang rem dor? Kan nang shitom ruh ia ki briew ban ioh ia ka jingkoit ka jingkhiah bad ka jingsumar pang kaba bha ha ka por ba ki donkam ia ka? Haba ka met ka pang bad ka khrew, ka mynsiem ruh ka dukha, ka swai bad ka lwait.

Ha kane ka jylla kaba rit jong ngi, ka jylla kaba duna ka jingmih- kaei ka ban jia ha ki por ki ban sa wan? Kumno ngin pyndap bad pynbiang ia ka jingim?

Kam dei tang ka khlam corona kaba pynjynjar ia ngi, baroh shi katta ma ngi da lade ngi la pdiang bad seng nongrim ia ka jingim, ia ka imlang ka sahlang, ia ka kamai ka kajih bad ia ka synshar ka khadar kaba khwan myntoi bad kaba pyrkhat shimet.

Ngi la seng nongrim bad pyniaid ia ka pyrthei ha kata ka rukom ba ka spah ba u Blei u la kynrkhu ka lang lynnong lynnong tang ha ki katto katne tylli ki lynghoh kti.

Ngi la seng nongrim bad pdiang ba ka sumar pang ka dei ka lad kamai spah shimet, ym ka hok long briew man briew ba ngin im shong prah shong shang bad ba ngin khiah krat.

Ngi la seng nongrim bad pdiang ia ka jingphiah kyrdan ha ka imlang sahlang.

Ngi la seng nongrim ia ka ioh ka kot bad ka kamai ka kajih kaba lah shilliang.

Ngi la seng nongrim ia ka synshar ka khadar kaba leh shilliang khmat.

Kynmaw, ba ki kynhun niam ruh kim shym lah ban pynim bad ban pyllait luid ia ngi na kane ka jinglah shilliang bad ka jingleh shilliang khmat. Ha kiba bun ki khep ki kynhun niam ki kubur bad ki mynjur pynban bad kine ki nongrim, ki iamir lang bad ki bor synshar ne ki rukom synshar kiba khnoit bein ia ki briew.

Ka khlam ka wan bad ka khlam ka leit, bad haba ka khlam ka wan ban lynshop- ngi lynga, ngi tieng bad ngi ud jynjar sat. Ngi ud ruh namar ba la ban khia shuh shuh ia ngi da ki jingeh kiba mih na ki nongrim ba ngi la seng bad ba ngi la saindur ban pyniaid ia kane ka pyrthei.

Bad hapdeng kine kiei kiei ka mih kane ka jingkylli- Kaei ka dor bad ka bor jong ka Gospel ha ka pyrthei kaba ud jynjar sat?

Ka Good Friday ka pynkynmaw ia ngi ym tang ia ka jingshah iap u Jisu Khrist halor ka diengphna. Hynrei ka Good Friday ka pynkynmaw ia ngi ia ka jingim bad ki kam ba u Jisu u la leh mynba u dang don ha kane ka pyrthei.

Ka Good Friday ka pynkynmaw ia ngi ia ki daw balei ba u Jisu u wan longbriew sha kane ka pyrthei? Balei ba u leh ia ki kambah? Bad balei ba u shah pyniap halor ka diengphna?

U Jisu u wan sha ka pyrthei ban ai ia ka jingim ba pura bad ba dap kyrhai.

U Jisu u bsa ia kiba thngan bad u pynkhiah ia kiba pang namar ba u don ka jingiatiplem na ka bynta kiwei pat.

U iada ia ka nongsamaria bad u ieng ha syndah jong ki nongtong dohkha, ki nongkhrong, ki nongbylla sngi bad u ia ienglang bad ki ha ka jingiakhun bad ka jingiaksaid jong ki ha ka jingim.

U Jisu u kyntait bad u pynrem ia ka khwan myntoi bad ka pyrkhat shimet. Bad u Jisu um pdiang ia ka jinglah shilliang bad ka jingleh shilliang khmat.

Ha ka shithi sha ki Nong Galatia 3: 28 ka ktien na ka Baibl ka ong kumne, “Kumta, ym don jingiapher hapdeng ki Jiw bad ki Jentil, hapdeng ki mraw bad kiba laitluid, hapdeng ki kynthei bad shynrang, phi baroh phi ialong kawei ha u Khrist Jisu”

To Ngin ia duwai:

Ah Blei Trai Kynrad, kane ka khlam corona ka shoh, ka pyniap bad ka pynjulor ia ka jingim.

Ngi tieng, ngi artatien bad ngi ud jynjar sat.

Kumba U Jisu Khrist u iam bad u ud halor ka diengphna, ngi ruh ngi ud kynrad. Ha kajuh ka por pat, U Jisu u la jop ia ka diengphna bad ia ka jingiap da ka jingmihpat.

Ai ha ngi da kajuh ka bor ka jingmihpat ka jong U Jisu Khrist ba ngin iakhun bad jop ha ka jingim.

Ha kane ka por ngi duwai kyrpang na ka bynta ki Doktor, ki nos bad ki nongtrei Hospital. To iada bad iarap ia ki. Ngi duwai ruh na ka bynta ki riewstad saian ba kin shem noh ia ki dawai bad ki lad jingiada na kane ka khlam.

Ai bor ia ngi ba ngin ia ienglang kawei ba ngin ia khyllie iwei ia iwei pat na kane ka jingjulor.

Ai ha ngi ia ka jingtngen bad ka jingkyrmen.

Ah Blei ba ju iarap ia ngi ngi kyrmen ruh ha Me.

Ngin iai ap da ka jingkyrmen, wat la ngi sngew ba kata ka jingkyrmen ka long ia kaei kaei ka bym lah long. Hynrei ngin iai kyrmen namarba ngi ngeit skhem ba ka don ka lynti sha ka jingkyrmen.

Ia ngi ki Khristan ka Diengphna ka dei ka lynti sha ka jingkyrmen.

Paralok baieid, ngin pynkut ia kane da kaba ngi ia kynud lang ia kane ka jingrwai kaba khatar na ka Khasi Hymn Book ryngkat bad kane ka sur jingtem. U Blei un kyrkhu ia phi baroh. Amen

 

Nga ai khublei kyrpang ia i Andrew D. Lyndem iba la shah ban pyndonkam ia ka studio jong i, ka Kremlyn Sound Studio bad iba la iarap ruh ban record, ban pynbit pynbiang bad pynmih ia kane.

Ki sur jingtem bad ki link kiba la kdew haneng ki dei kiba la shim kylliang na Youtube bad nga sngewnguh ba ki don kine ki sur jingtem kiba nga ngeit ki la long ka jingkyrkhu ia ngi baroh.

Raiot

Subscribe to RAIOT via Email

Enter your email address to subscribe to this blog and receive notifications of new posts by email.

Join 15.7K other subscribers

Kyrsoibor Pyrtuh is a pastor interested in intersection between theology and social power

Be First to Comment

Leave a Reply