La Pynmong ïa Ka Dur Blei

Shi taiew mynshuwa ngi la ioh ia ka Baibl Sunday bad lada dang don ei ei ban bynrap ka long ba ka Baibl ka dei ruh ka kotbah kaba kren shaphang ka jingim hangne ha pyrthei. Ka kren shaphang kiei kiei kiba ngi lah ban iohi bad ban tba, wat la ki don ki khep ba ka kren sha ngi ha ki dur pharshi.

   Ki khana ha ka Baibl ki long kiba la rim bad kumta ngi hap ban pule thymmai ia ki bad ngin hap ban pynthymmai ia ki jingmut jong ki bad pyndei ia ki bad ka por ba ngi im. Kane kam mut ba ngi pynhiar kyrdan ia ka, hynrei ka Baibl kan iaineh hi ka kotbah-ka kot bakhuid-ka kot kaba Ïai im bad ki khubor kiba pynim kin Ïai mih pateng la pateng. Nga ngeit skhem ba ki longshuwa kin ym mong lada ngim pule shuh ia ka Baibl kumba la pule ia ka ha ki spah snem kiba la leit noh, pynban kin kmen ba ngi la nang ban pule bad ngin pule ia ka na ka bynta ka spah snem kaba arphew wei. 

    Ka Baibl ka iathuhkhana shaphang u Blei uba im bad uba treikam hangne ha pyrthei. U Blei u treikam lyngba ki briew, hynrei ki don ruh ki por ba U wan hiar hi da lade ban im, ban ïaid, ban iaksaid bad iakhun ryngkat bad ki briew hangne ha khyndew. Mynta kumne ngi don ha ka aiom Khristmas, ka por kaba ngi kynmaw ba u Blei u wan ban im bad ngi hangne ha pyrthei. U Jisu Khrist u wan ban im bad u wan ruh ban iakhun ryngkat bad ngi hangne ha pyrthei. U Jisu u iakhun ruh na ka bynta jong ngi bad ka khubor Khristmas kaba ngi don ban ai sha ka pyrthei ka long ba u Jisu u wan ym tang ban pynim, hynrei ban tei thymmai bad ban ai ka jingim kaba dap kyrhai. Sa ha ka pyrthei jongno pat ngin dang iawad ia ka jingim kaba tngen, kaba shngaiῆ bad ba don jingkyrmen? Sa ka jaka aiu pat ngin dang iawad ka ban kham bha ban ia kane ka pyrthei kaba u Blei u la wan hiar hi da lade? U Blei u la wan, u wan bad un Ïai wan ban pynbha bad tei thymmai ia ka pyrthei na kawei ka pateng sha kawei pat. Ma ngi kiba dang sah, kiba ap ia ka jingwan arsien u Jisu ngi ngeit skhem ba ka jingwan arsien U Jisu kan long hi na ka bynta kajuh ka jingthmu, kata ban pynbha, ban pynthymmai bad ban pynim, ym dei da kumwei pat.

   To ngin ia pule bad puson mynta ia ka kitab Jenesis 1:26 “U Blei u la ong ruh, to ngin iathaw ia u briew ha ka dur jong ngi hi, katba kum ka jingiasyriem jong ngi hi…” Ka kitab Jenesis kam dei ka kitab kaba la thoh hamar ka por ba u Blei u thaw ia ka pyrthei-ka mariang. Ban sngewthuh ia ka kitab Jenesis ngin hap ban pule ia ka histori bad ki khana kiba la hiar pateng da ki spah bad hajar snem ha ki Ri bad thaiñ Arab. Ki Ri bad ka thaiñ Arab hyndai ka kynthup ia kata ka “Middle East Region” mynta, bad ka Ri Israel ruh ka dei kawei na kita. Mynta kumne namar ki thma ha Irag, Syria bad kiwei de ki Ri Arab, ngi iohi bad pule shaphang ki Ri bad ka thaiñ Arab. Hynrei kaei kaba ngi iohi mynta haduh katno ka lah ban ai jingshai ia ngi, lymda ngi ngam bad iaid halor ki Ri Shyiap jong ka thaiñ Arab. 

Hyndai ha ka thaiñ Arab ki kynhun jaidbynriew bapher bapher ki don la ki jong ki Blei ba ki mane bad ha kajuh ka por pat ki ngeit ba don sa uwei pat u Blei uba kham halor ia ki blei baroh bad ia uta u Blei, ki khun Israel ne ki Jiw ki khot u Yahweh, u Blei uba thaw ia ka bneng bad ka khyndew bad uba pynlong ia kiei kiei baroh. Nalor nangta, ki jaidbynriew bapher, ba kynthup ruh ia ki khun Israel ki ngeit ba ka ju don ka Dorbar Blei kaba ia rai lang ban thaw ia ka pyrthei-mariang, tangba ka jingngeit jong ki khun Israel ka long ba u Blei Yahweh marwei bad tang marwei hi u long halor bad u leh ia kiei kiei baroh bad ka rai jong U ka long kaba kut.

Ka kitab Jenesis 1:26 bad ki kyntien kiba ong, “to ngin iathaw ia u briew…” ka kren shaphang ka rai jong ka Dorbar Blei ban thaw ia ki khunbynriew ha ka Dur jong u Blei- “Ha ka dur ka jong ngi hi” ong ka Baibl. Kaba kumno kata ka dur jong u Blei? Katkum ka hukum, ki Jiw kim lah ban iohi ia u Blei lymne thaw dur ia U. Kaba kumno pat kata ka dur u Blei kaba u khunbynriew u kup? Kaei ka jingmut jong kine ki kyntien? ne ka mut aiu ban kup ia ka dur Blei?

Ki riewstad Baibl ki ong, don lai tylli ki rukom pyrkhat (i) Ka dur Blei ne ban iasyriem ia u Blei, ka mut ba u briew ne ka briew ki phalang ia ka dur Blei tang ha ka met ka phad bad tang ha kaei kaei kaba paw shabar. Kaba mut ka jingiasyriem ia u Blei tang ha kaba shabar. (ii) u briew ne ka briew ki iasyriem ia u Blei ha ka bor pyrkhat, ka bor shemphang bad ka jingstad bad (iii) u briew ne ka briew ki kup ia ka dur Blei ha ka longrynÏeng jong ki baroh kawei. Ki kup ia ka dur Blei ha ka met, ka bor, ka jingstad bad pura nadong shadong. 

Ki khunbynriew ki lah ban sngewkhaiñ ba ki iasyriem ia u Blei, ki lah ban sngewkhlaiñ ba ki kup ia ka bor Blei bad ka jingstad Blei. Mano ban pynkhyllem bad mano ban pynsniew ia u briew ne ka briew? Pynban hamar kane ka khyllipmat hangno re hangno la pynsniew bad pynmong ia kata ka dur ba kynja Blei. Katba nangiaid ki sngi la nang pynmong, la nang pynmynsaw bad pynsniew ia ka dur Blei da ki rukom bapher bapher. Ngi iohi ia ka dur Blei kaba shah pynmong ha ki briew kiba kylla phewtwir na ki daw kiba bun. Ngi iohi ia ka dur Blei kaba shah pynmynsaw ha ka longrynïeng jong ki nongrep kiba iakhih pyrshah ia ki Aiñ kiba ban beiñ ia ki. Ngi iohi ia ka dur Blei kaba shah pynmong ha ki “migrant laborer” ne ki nongbylla sngi kiba krih na kawei ka shnong sha kawei pat ban wad bylla. U Joseph, u kpa jong u Jisu ruh u dei u “migrant laborer” ne u nongbylla sngi uba krih na kawei ka shnong sha kawei pat bad la kha ia u Jisu ha ka por ba u Joseph bad ka Mary ki leit sha Bethlehem ban wad bylla. Ngi iohi ia ka dur Blei kaba shah pynsniewdur ha ka jingim jong ki briew kiba shah khaÏi mraw. Ka jingkhaÏi mraw ia ki briew kam pat kut hynrei ka nang jur bad sdang thymmai ha kane ka juk.

Ym don da kawei pat ka dur Blei kaba la shah pynmong bad kaba la shah pynmynsaw, lait na ka dur U Jisu. Ka Khristmas kam shym jngai na ka Good Friday. Ngi kmen bad lehkmen ha ka Khristmas namar ba U Jisu u khun u Blei U la wan ban pynim bad ban pynbha pat ia ka pyrthei, katba ka Good Friday pat ka pyni ha ngi ia ka dur kaba la shah pynmong bad pynmynsaw. Na ka dur jong u khunlung hapdeng ka ksiar, ka mir bad ka jingiwbih sha ka dur jong ki thri, ki diengsympat,ka pansngiat shiah bad ka diengphna. Ka dur kaba la mong bad kaba la mynsaw ka Ïai snoh wat ha ka met kaba la mihpat jong u Jisu. La pynmong ia ka dur Blei kaba paw ha ka longrynïeng u Jisu Khrist, pynban da kata ka dur kaba la mong, U Jisu u la tei bad pynbha pat ia ka pyrthei. 

Katba ngi dang ap ia ka jingwan arsien u Jisu, ka jingpynmong, ka jingpynmynsaw bad ka jingpynsniew ia ka dur ba kynja Blei ka nang jur bad ka nang shyrkhei. La pynmong ia ka dur ba kynja Blei da ki kam leh jubor ia ki para briew bad ia ka mariang. Ngi pynmong ia ka dur ba kynja Blei da ki kam thombor ia kiba tlot bor bad ia ki ritpaid. Ngi pynmong ia ka dur ba kynja Blei da ka jingban beiñ ia ki rangli ki juki bad ia ki nongbylla sngi.

Ngi pynmong bad pynsniew ia ka dur ba kynja Blei da kaba ka kyntait ia ki parabriew ki bym lah ban im kum ki shynrang ne kum ki kynthei. Bad ngi pynmong bad pynsniew ia ka dur ba kynja Blei da kaba ngi kyntait ia kiba duna ki dkhot met.

La pynmong ia ka dur ba kynja Blei da ka saiñ pyrkhat kaba pynksan ba ki briew bad ka mariang ki dei ban jot, ban jynjar bad ban iap na ka bynta ka roi ka par. Kane ka long pyrshah ia ka nongrim kaba u Jisu u ïeng. Ka Baibl ka hikai ba iwei i sim Ïing ruh in ym hap noh khlem ka jingtip jong u Blei, katba ha kane ka juk pat ki briew ki ïap, ki kylla phetwir, ki jahrngai bad ki kylla duk na ka daw ka jinghiar thma bad ka jingiaid lynti u ‘lei thymmai ka roi ka par.  

Ngi dang ap ia ka jingwan pat u Trai Jisu bad ka Baibl ka iathuh ia ngi ia ki dak jong ki sngi kiba khatduh ne ki dak jong ka jingwan arsien u Jisu. Ki dak bapher kum ki thma, ki khlam,ki jingiapthem, jingkyrduh bam, ki dak ha ki khlur, ka sngi, u bnai bad kumta ter ter. Katba ngi dang ap ia ka jingwan u Trai Jisu bad khmih thuh ia kine ki dak, balei keiñ ngim ῆiew ia ki kum ki dak mong ha ka dur ba kynja Blei? Balei ngim shim ia ki kum ki dak mynsaw ha ka dur ba kynja Blei?

Ki dak kiba paw ha ki khlur, u bnai bad ka sngi, balei keiñ ngim shim ia ki kum ki dak mong bad ki dak mynsaw jong ka mariang? bad namarkata donkam ban tei bad pynbha pat ia ka pyrthei-mariang. Balei ngim shim ia ki kum ki dak kiba pynthut ia ka jingngeit-ka jingshem mynsiem bad ia ka theoloji jong ngi bad ba ngin kut jingmut ban pynioh biang ia ka dur kaba kynja Blei.

Ar hajar snem mynshuwa ha ka por ba u Jisu u wan sha ka pyrthei; ki thma, ki khlam, ki jingkyrduh bam bad ki jingpang kiba kham shyrkhei ki la jia ha ka pyrthei. U Jisu um shym la ñiew ia ki ba ki dei ki dak jong ki sngi kiba khatduh, hynrei u la shim ia ki kum ki dak kiba pynthut ia ka jingmut jingpyrkhat bad kiba khot ia u sha ka mission kaba khraw ban tei, ban pynbha pat bad ban pynioh biang ia ka dur ba kynja Blei ha u khunbynriew bad ka pyrthei-mariang.

la pynkhiah ia ngi da ka jingpynshitom kaba u la shah
Amen

 

Raiot

Subscribe to RAIOT via Email

Enter your email address to subscribe to this blog and receive notifications of new posts by email.

Join 15.7K other subscribers
Kyrsoibor Pyrtuh Written by:

Kyrsoibor Pyrtuh is a pastor interested in intersection between theology and social power

Be First to Comment

Leave a Reply