Ngin jop ne ngin shah jop ( URANIUM )

Ka sorkar India ka la kam bad aidaw ba ka kwah dik dik ban khlong ia u uranium naba kan iarap ha ka ban pynmih iaka bording kaba Kham tad dor katba ka jingshisha ka long ba katkum ka jing wad bniah jongka Massachusetts Institute of Technology ha u snem 2003 bad 2009 la lap ba ka bording ba la pynmih naki kharkhana Nuclear( Nuclear Plant) ka kham remdor kumba 30-35% ban iaki bording ba la pynmih na kiwei. Wat ka World Bank kaba ju kyrshan Pisa iaki Nuclear Plants ha kylleng ka pyrthei ka la kham kynran dien na ka daw ka jing remdor palat haka snem 2010 bad 2011.Ka jingkwah ka sorkar India ban tih ia u uranium ha kylleng ki jylla kynthup ruh ha Mawthabah bad Domiasiat jongka Jylla Meghalaya, ngim lah ban len ba ka dei ka jingkwah jongka ban pynkhlain ialade haki bor nuclear (weapon) kumba ka la paw naka jingbym treh jongka ban ia soi iaki International Agreement kum ka shakhmatbNon Proliferation Treaty (NPT) bad ka Comprehensive Test Ban Treaty (CTBT).13724051_1365805046768062_6103712098300815012_o
U Uranium un nym ktah iaki jingthaw ba im bad iaka mariang lymda ym pat tih bad pynthud ia u hynrei phi tang shu tamti tamjat ban plied iaka synduk jongka Pandora ( Pandora’s box) ka jingktah kan long kaba shyrkhei bad ngi lah ruh ban pynshisha ia kata naki jingjia kiba shyrkhei bad khyllah kiba mih naka erbih (uranium) ha kylleng ka pyrthei bad ha Jaduguda(India). Haka 26th April, 1986, haba ka Unit IV jong ka Chernobyl Nuclear Plant ka la bthei , ka la wanrah iaka nemsniew ba shyrkhei haki bynta jongka Ri Russia, Belarus, Ukraine bad kiwei kiwei ki bynta jong ki Ri Europe bad Kane ka dang ktah wat haduh mynta. Ha kawei ka jingwad bniah halor ka Chernobyl Accident ia kaba la pynmih da ka Newyork Academy of Sciences ha u snem 2009, la lap ba ka erbih radiation kaba la mih na kane ka accident ka tam Spah shah ban iaka erbih kaba la pynmih naka jingpynhap ia u Atom Bomb ha Hiroshima bad Nagasaki jong u snem 1945. Katkum kane ka kaiphod , la lap ba kumba 550 million ngut ki briew ki la shah ktah haka radiation ha kaba antad kumba 205 million ngut ki dei kiba sah haki jaka ba shah ktah jur haka Area kaba 100,000 square miles( antad ka jingheh kat ka Jylla Maharashtra). Palat 4 lak ngut ki briew ba sah haki jaka ba 30 kms na Kane ka Nuclear Plant la phah phet shnong noh katba dang don sa kumba 5 million kynthup 1 million ngut ki khynnah ki dang sah hi ha ki jaka ba shah ktah jur shabar naka Ri Russia ong ka kaiphod jong ka N.A.S. Ngi la iohi ruh ba kaei ka jingktah ha Japan ha u snem 2011 haba u jumai bad Tsunami kila pynkhynniuh bad pynlong ruh iaka Fukushima Nuclear Plant ban pynmih iaka lyer bih(radiation) kaba la pynlong iaki 1,50,000 ngut ban hap phet shnong bad ban ieh noh iala ki ing ki sem bad ki jingri jingdup. La lap ruh iaka jingdon jongka radiation wat shaduh ki jaka ba jngai 200-300 kms na Fukushima.  Haka ” Paradise Lost : Tribes struggle against uranium mining in Jaduguda” u Tarun Kanti Bose bad u P.J George ki la iathuh ba hashwa ban tih ia u uranium ha u snem 1967, ka UCIL ka la wan ban pynbiej iaki Adivasi ba lada ki ailad ban tih uranium yn sa ai iaki iaka kam ka jam, yn sa wanrah iaka roi ka par ( development) bad ruh wat ban ai Pisa ( bribe) phewse hadien ba la tih pat, ki trai ri trai muluk ki la jan duh wat ka thliew jingtep na bynta ialade ruh.
Ha u snem 1972, ka Atomic Minerals Directorate( AMD) Exploration and Research ka la lap iaka jingdon u uranium ha shilynter ka thain Domiasiat bad Mawthabah ha kaba la pynthikna iaka jingdon naka jingksam ( drilling activity) ha u snem 1992-1996 . Hadien la aiti noh ia kane ka Kylleng-Pyndengumiong-Mawthabah(KPM) Project kaba don iaka area ba 422 hectares sha ka UCIL. Ia Kane ka jingksam la pynsangeh noh hadien naka jingmih jongki paitbah ban pyrshah hapoh ka jingialam u (L) H.S Lyngdoh bad ka Khasi Students’ Union. Ki riewshemphang ki ong ba lada sdang iaka project tih uranium ha Mawthabah bad Domiasiat palat 30,000 ngut ki paitbah kin shah ktah ( kaban Wanlam ruh shaka jingphet shnong) khlem da khein pat ia kiwei ki jingktah ki ban mih na ka jing wanrung kyrthlep ki mynder ( influx), ki jingma ki ban mih lada don ka jingthud haka processing plant bad kiwei kiwei. Kane ka dei tang ka kaiphod naduh u snem 1992. Lada dei baka UCIL kan iohlad ban tih mynta ne haki snem ba Kham hadien lei palat daki lak ki nongshongshnong kin hap ban phet shnong bad shah ktah jur haka radiation kynthup ruh iaki jylla ba marjan bad ka Ri Bangladesh.Uranium Rally
Ka Look East Policy jongka Sorkar India i kumba ka wan kum u Suri kup snieh langbrot ha ka kyrteng jong ka roi ka par ryngkat ka jingriam ban khlong ia u uranium ha Mawthabah- Domiasiat. Ha u snem 2009, ka sorkar Meghalaya kala ai jingbit iaka UCIL na bynta ki Pre-uranium mining developmental activities hynrei haka 01.August. 2016 la weng noh ia Kane da ka rai Cabinet ( Cabinet decision) jong ka Jylla Meghalaya. Kam pat dei ba ngin kmen ia kata, u Mukul Sangma ( Chief Minister) u la ong ba la weng noh iaka soskular bad ka UCIL phewse u pynbakla pat ia kiba bun ba lang ba ka Two Lane na Nongstoin-Mawthabah ia kaba la mang naka SARDP-NE jongka Ministry Of Roads, Transports and Highway (MoRTH) watla ka la paw shai haka objective jongka ba ka dei ka pre-uranium mining project da kaba u ong ba kam don ka jingiadei bad u uranium. Ka jingweng iaka soskular bad ka UCIL ka dei kawei naki sienjam kaba biang bha hynrei kumba ka UCIL ka dei ka Company hapoh ka jingpeit jongka sorkar (Department of Atomic Energy) kumta ngi dei ban sngewthuh ba ka kam tih uranium ka dei ka kam jongka sorkar. Ngi dei ban sngewthuh bad longshai haka jingmut jingpyrkhat namar ki pre-uranium mining projects nangne shakhmat kin nym wan shuh na ka UCIL kum haki snem ba la leit hynrei kin sa wan ruh na kiwei ki department kum ka MoRTH bad kiwei kiwei. Ngi dei ban peitngor ioh lehse kane kan dei ka jingriam ( trap) ban Ialam bakla iaki paitbah halor ki pre-uranium mining projects nangne shakhmat.
Ka long kaei kaei kaba i duh jingkyrmen naba ki nongmihmat jongngi ki la shu ia lap miet ban lamler iaka jingshisha khlem khein shuh iaka sang ka ma tang na bynta ka shuki bad ka myntoi shimet jongki. Ka sorkar ruh kaba la leh meinah shaba palat bad ka bym khein iaka hok longbriew manbriew tang ban buhrieh iaka jingshisha jong ka jingshah ktah na u uranium kaba la mih naka jingksam ia u naduh ka snem 1992 haduh 1996. Palat spah ngut ki briew ba la kha Anna haki thain Warsan Lyngdoh, Umdohlun, Phlangdiloin bad kiwei kiwei ki jaka ba marjan bad ka Mathabah phewse kiba bun naki kim don ne ioh iaka Disability Certificate kumba iohlem kiwei. Kane ka pyni shai kdar ba ka sorkar kmie bad ka sorkar jylla ki thmu ban buhrieh hakhmat ka pyrthei iaka jingktah u uranium kiba mih hadien ka jingksam ia u uranium ha kitei ki thain.
Haka 16th April, 2015, ki nongiashim bynta naki 20 tylli ki ri ki la iasoi iaka Declaration of World Uranium Symposium ha Quebec, Canada ban pynskhem iaka Declaration of World Uranium Hearing 1992 ( Salzburg, Austria) , ia ka Indigenous World Uranium Summit 2006( Navajo nation, USA) bad iaka PPNW- World Conference 2010 ( Basel). Ha kane ka Declaration of World Uranium Symposium 2015, la dawa naki ri ka pyrthei ban sangeh noh iaka jingksam uranium ( Drilling and Exploration), ban tih uranium, ban shna iaki Processing Plant bad Nuclear Plant.
Ka jingthmu ban tih ia u uranium ngi dei ban kynmaw ba ka dei ka jingpyrshang pynduhjait iaka Jaitbynriew jongngi ( Genocide). Ngin jop ne shah jop ka shong hangi ba ngin rai. To ngin iatylli lang kawei bad ngin bret noh iaka jingkwah ban rhah spah jubor naba mangi ngin hap ai jingkhein haki longdien jongngi.
“Ka Jaitbynriew kaba im ka dei ka Jaitbynriew bym ju ryngkoh ruma”
    Ong EM ia u uranium

Raiot

Subscribe to RAIOT via Email

Enter your email address to subscribe to this blog and receive notifications of new posts by email.

Join 15.7K other subscribers
Forwardman Nongrem Written by:

President, Khasi Students Union, South West Khasi Hills. Graduated from St. Anthony's College Shillong. From Rangthong.

Be First to Comment

Leave a Reply