U Jisu U La Jan Wan?

“…ma ngi kiba dang im, ia kiba la pynsah haduh kata ka jingwan u Trai…”
I Sha Ki Thessaloni 4:15

Ka jingwan arsien u Jisu Khrist watla ka dei ka mat kaba iakren tang hapoh ka jylli Khristan pynban ki don ki khep ba ka ktah ia ka imlang-sahlang, ia ka jingiadei shi iing shi sem ne para marjan ne para shnong bad ka wanrah ia ka jingpait iing bad pait Balang. Katkum ka Bible, ha ki sngi kiba nyngkong jong ka Balang Khristan ki bangeit ha u Jisu ki ap khmih lynti ba kata ka iia bad ka jingwan arsien kan jia noh ha ka pateng jong ki hi.

Ka jingwan arsien u Jisu la ju pyniasnoh ruh bad ka jingwai noh ka pyrthei bad ha ka Bri u Hynniewtrep ruh ki la don ki kynhun jong ki riewngeit Khristan kiba ha ka jingpynkhreh jong ki ban iashem bad kita ki sngi kiba khatduh ki bret, ki kyntait bad ki khein dewthala ia ki jingdon jingem, ia ka spah ka phew bad ki pyrshang ban pyndkut noh ia lade na baroh ki jingiadei ha kane ka pyrthei doh.

Kane ka sermon kam dei ban pynrem ne pynksan ia kita ki jingjia lymne ban ialap ia ka jingwan arsien u Jisu. Hynrei, ka jingwan arsien u Jisu ka mut aiu ia ki Khristan kiba nyngkong bad ka don aiu ban ong ia kane ka juk? khamtam eh ha kane ka por jong ka jingpang covid19 kaba la pynsheptieng ia ki briew? Tang mar ia sdang pur ka khlam ha ka Ri, ki jingialap shaphang ka jingwan arsien u Trai ki  sawa jam bad ki khot ia ki briew sha ka jingkylla kaba mut, ka jingpynthymmai ia ka jingim bad sha ka jingpynkhreh ban iashem bad u Trai. Kam long kaba bakla ban ialap bad iawer ia ki khun bynriew sha ka jingkylla kaba mut. Ha ka jingshisha kane ka dei kaba kongsan tam, khamtam eh ha kane ka por khlam ban kylla kaba mut bad pynthymmai ia ka jingim sha ka jingbeit bad jinghok. Ban kylla kaba mut  sha ka jingsngewlem bad jingiatiplem para briew, sha ka jingiaieid kaba kham janai para shnong, para marjan, ban iakyrshan bad iakit lem ia ka khia ka shon jong kiwei. Ki bor synshar ki la dei ban kylla kaba mut, ban pynthymmai bad don ia ka dohnud iatiplem bad mynsiem sngewlem, ban peit nyngkong eh ia ki briew kiba don ha trai duh ka pyrnon jong ka imlang sahlang, ia ki briew ba kyrduh tasam ki bym don ei ei bad ki ban iapthngan nyngkong lada ka khlam bad ka jingkhangdam ka dang iai bteng. Hapdeng ka hiran pyrthei bad ka khlam kaba pynkyrduh ngi dei ban kylla kaba mut bad pynthymmai ia lade da kaba ngi rai kut ban pynphai noh ia ka spah bym hok baroh ne ka pisa bamklop khnang ban lah ban pyndonkam ia ka na ka bynta ban pynim biang ia ka kamai kajih bad ka ioh ka kot jong ki nongshong shnong. Lehse, ka lah pat ban long da khongpong, ka jingbamklop kan nang jur pynban namar ka por khlam ym don lad, don lynti ban kylli?

U Apostol Paul u dei u nongthoh ba nyngkong eh shaphang ka jingwan arsien u Jisu bad u thoh sha ki riewngeit ha Thessaloni. Katkum u Loukas, u Paul u mih kyrkieh na Thessaloni kumba ha ki snem 50 AD bad um shym la lah ban pyndep ia ki kam ialap bad u la shu ieh jyndat ia ki riewngeit. Khlem pep u la hikai bad ialap ruh shaphang ka jingwan arsien bad kane ka la pynkulmar jingmut ia ki bangeit, kumno kan long kata ka jingwan arsien? Ka la mih ruh ka jingkulmar namar ba don napdeng jong ki kiba la khlad noh bad kaei ka ban jia ia ki ha kata ka sngi? Hato kin shah kyntait bad kin ym lah ban iashem bad u Trai? Hadien kata u Paul u thoh da ka shithi ban pynshai bad ai jingkyrmen ia ki bad ong, “…ba ma ngi kiba dang im ngin ym leit ha shuwa kita kiba la leit noh…” Nalor nangta u Paul u nang pynbha shuh shuh ia ka jinghikai jong u halor kane ka phang ha kiwei pat ki shithi. Ki shithi ba ar sha ki Thessaloni  bad ki Nongkorinth. Ki riewstad Bible ki batai ba kine ki shithi kiba hadien ki pynpaw ba ka jingpyrkhat shaphang ka jingwan arsien u Jisu ka pynlong ia ki briew ban iai pynthymmai bad pynkhuid ia ka jingim hangne ha pyrthei. Ki ong ruh ba kane ka jinghikai jong ki Apostol ki long kum ki ‘tien phira ia ki Khristan kiba nyngkong. Ha ka kot, Paul The Tent Making Missionary, u Anugraha Behera u ong, “ka jingkyrmen bad jingap khmih lynti ia ka jingwan arsien u Jisu, ym dei tang ba ka iarap ban tei ia ka jingim ba man la ka sngi, hynrei ka iarap ruh ia ki riewngeit ban iai kylla kaba mut, ban iai pynthymmai ia ka jingim bad ban im ka jingim kaba beit, ba hok bad pynkhreh ban iashem bad kata ka Sngi Bishar”.

Katkum i Phadar Sngi Lyngdoh, [su_quote]… ka jingbatai ia ka jingwan pat u Jisu ka iasyriem shibun ia ka Sngi u Trai Kynrad jong ki khun Israel, khamtam eh ha ki dak ki shin bad ki jingjia ba pher ba pher… ka “Sngi U Trai Kynrad” kam iapher na ka Sngi jong ka Jingwanpat jong U, namar ba u Jisu ruh, kum u Messaia bad u Khun u Blei, u dei u Trai Kynrad. Ha ka jingshisha, ka jynjia, ka ban long ka jingkut jong ka juk ka Pap bad ka jingsdang jong ka Juk ka Hok, ka dei ka jingwanpat u Jisu ha ka sngi bakhatduh[/su_quote]

Ka spah snem ba nyngkong ka dei ka por kaba kordit ia ki Khristan namar ba ki shah pynshitom ha ki Jiw bad ka Hima Rom hyndai. Wat u Paul ruh u dei uwei na ki riewshongshit niam uba kthong bad pynshitom bein ia ki Khristan shuwa ba un kylla. Ha ka spah snem ba nyngkong, u Jisu u nonghikai bad u nongpynim um don shuh bad ki; u la shah kem, shah bishar, shah pyniap ha ka diengphna, u la mihpat bad kiew sha bneng. Ha ka por ka jingshah pynshitom, ki Khristan ki donkam ia ka jingdon jong u Jisu ha ka doh, ban iatreikam bad iakhun lang bad ki. Namarkata, ka don ka jingkhmih lynti kaba jur hapdeng ki Khristan ha ka spah snem ba nyngkong ba u Jisu un wan biang ha ka pateng jong ki hi.

Hooid shisien, ha ki hajar snem kiba la leit noh u Jisu u la wan, u la im, u la hikai, u la iakhun bad ai jingkyrmen ia ki briew. Lada u Jisu un wan biang un wan ha ka longdoh longsnam bad ki khun bynriew ki lah ban iohi, ban iohsngew bad ban ktah ia u. Mynta kumne u Jisu um don shuh ha ka doh ha pyrthei hynrei ki kam bad jinghikai jong u ki dang im bad treikam. Ki bangeit bad ki nongbud jong u ki dang iai ialap ia ka khubor ba bha bad ma ngi ki long mynta ngi  rwai bad ngin iai rwai ia ka jingrwai jong ka Mari, ka jingrwai jong ka jingpynthut (Song of Disruption) kaba ong, “u pyni ka borbah da ka ksangti jong u; u pynsakma ia kiba sarong…u pynhiar ia kiba khraw bor na ki khet, bad u kyntiew ia kiba rangli; ia kiba thngan u pyndap da kiei kei kiba bha; ia kiba riewspah te u phah noh suda”(Loukas 1:51-53).

Kumba ngi mutdur bad khmih lynti, u Jisu haduh mynta ruh um pat wan; lano un wan? Kumno un wan? Hangno un wan? Kaba kham pynshaiong bad ka long ruh kaba ym lah ban pdiang, ba ki don ki kynhun riewshitniam Khristan kiba pynshongrim ba u Jisu  un sa wan mar mar hadien ba la pyndep ia ka jingdakhol jubor ia ki jaka bad ka jinghiar thma pyrshah ia ki nongshong shnong ka Ri Palestine mynta.

U Jisu u ong, [su_quote]…naba phim tip lymne ia sngi lymne ia ka por ha kaba u wan U Khun u briew. [/su_quote] Lehse, ei ba tip u Jisu u la wan bad u don mynta hangno re hangno ha ki bynta ba pher jong ka pyrthei? Na ka pateng sha ka pateng, ki don bun bah ki briew kiba shah shitom na ka bynta kiwei bad kiba len ialade na ka bynta ka hok bad jingshisha. Lada u Jisu u la wan ruh ngin ym ithuh ia U, bad ym tang ba ngim ithuh, hynrei ngim pdiang ia U iohba u pynthut bad ieng pyrshah ia ki kam bymman, ki kam runar jong ngi. Wat hapdeng kane ka khlam ngi sakhi ia ki bor kiba thombor, kiba set kak bad pynkbum jubor ia ka sur jong ki nongshong shnong kaba dawa ia ka kamai jakpoh. Ki bor kiba thom da ka bor ban pynsngap jar ia ka sur kaba pyrta ia ka jingim ba dap kyrhai bad ka jinglaitluid na ka jingshah ban bein. Ioh lehse u Jisu u la wan, tangba ki bor kiba thom bor kim shah ia u ban rung ha ki shnong ki thaw, ki iit ki Hima bad wat ha ki jaka mane Blei? Ngi pynap da ki shipai ki pyrton, ki tup ki man, ki liengsuin bad ki roket thma, ki jingpynbthei kiba shyrkhei bad ngi ong ia u Jisu, “mem bit da lei lei ruh ban rung”.

Ngan pynkut da ki kyntien ka Madam Lapp, ka nonghikai na ka Balang Mennonite, kaba ong kumne, “lada u Jisu un wan noh lashai, ngan dang thung hi u dieng mynta ka sngi” bad u nongrwai ruh u rwai, “Ngin trei tad Jisu wan

Amen.

Raiot

Subscribe to RAIOT via Email

Enter your email address to subscribe to this blog and receive notifications of new posts by email.

Join 15.7K other subscribers

Kyrsoibor Pyrtuh is a pastor interested in intersection between theology and social power

Be First to Comment

Leave a Reply