Ban Sngewthuh Ia Ka Kam Counselling

Bun sien ki briew shane ki sngewthuh bakla ia ka kam Counselling khamtam ia ka kam ki Social Workers. Ki briew kiba la kynthup lang ia ka Sorkar Jylla ki sngewthuh bakla haba ki mut ba kam da don jingiapher ei ei hapdeng ka kam Counsellor bad Social Worker. Imat ki sngew ba namar ba baroh ar ki dei ki kam ba iarap ia ki briew khamtanm haba iadei bad ka imlang sahlang, te imat ki dei ki juh.
Ngin ia peit khyndiat,

Mano Kita ki Social Worker?
Social Work ka de ka jait kam treikam kaba iatreilang bad kiwei ki de ki jait nongtrei, ban trei kyrpang ban iarap ia ki Khynnah, ki Rangbah –Kynthei bad Shynrang bad ia ki longing longsem ban pynbha ia ki rukom im ki jong ki bad, hapoh ka jingialam ka rukom treikam ka Aiǹ bad ki policy jong ki sorkar ban iarap ia kito kiba lah shah ban beiǹ bad shah pynthuh ka rukom im kaba man ka sngi.
Ka jingwan iarap ki social worker ka lah ban long ha ka jingthmu ban iada na ki jingjia kiba sniew lane kat kum ka jing bthah ka aiǹ ban iada lane iarap ia ki briew na ka jingshah thombor, shah lehbeiǹ lane ban iarap weng shwa shipor ia ki khyllung khynnah na ki longing ban iada ia ki na ki kam beaiǹ.
Ki Social Worker, ki hap ban kylla bun jait ki rong- phong kum ki paralok ba donkam, ki nongiasaid aiǹ, bad ban pyndonkam lut ki lad ki lynti bad ki buit baroh khnang ban iarap iano iano ruh.
Ki Social Worker, ryngkat bad kiwei ki nongtrei kiba treiia ki kam ban iarap ia ki briew ki trei ha ki nongrim kiba iadei bad,

• Ki hok longbriew manbriew, bad ki aiǹ ba iada ia ki khyllung-khynnah bad rangbah.
• Ka jingiaryngkat dor jong baroh ki bynriew bad ka jingburom ia ka jingiapher iwei pa iwei khlem da leh shilliang iano iano ruh.
• Ka jingiada ia u/ka briew ia ki bor kiba thmu ban banbeiǹ bad ban leh shilliang iano iano ruh.

Hadien ki jinghikai kiba tikna, ki social worker ki don ka bor ban pynbeit bad trei ha ki jaka ba don ki jingeh kiba khraw, kiba don jingma kiba shyrkhei bad ha ki por ba jur bha ka jingthut ia ki jingmut jingpyrkhat bad ki lah ban sngewthuh lyngba ki sap ki jong ki lada dei ne em ban pyrshang ban pynbeit bad ban kheiǹ bniah bad pyrkhat janai ia kaei kaban seisoh lada ki pyndonkam ia ki atiar ki jong ki. Ki don ki por ruh ba ki social worker ki hap ban ialeh da ki bor jong ka aiǹ ban iada ia ki khyllung-khynnah lane rangbah na ki jingma kiba ap iaki lane ia ki majan jong ki.
Ka Social Work ka dei ka jait jingpule kaba shim bad don bynta lang bad kiwei ki jait jingpule kum ka psychology, sociology,philosophy, ethics bad ter ter ban sngewthuh ia ki jingeh kiba jwat ha ka imlang sahlang. Kane kam shim mut pade ba ki la tbit lut ha baroh kita kiwei ki jait jingpule lane kam.
Kumban shu kdew, wat la ka Social work ka don ka jingpule ia ka subject Psychology, kata kam shim ai pade ia ki ki atiar, ki jingtbit bad jingpyrkhat lane kita ki “psychotherapeutic methods and techniques” ban pyndonkam haba leh ia ka kam counselling kum kita kiba da pyntbit shisha ha katei ka kam. Hooid, ki donkam ban pule ia ki jinghikai na ka subject psychology namar ba ki hap ban pyndonkam ia ki haba ki pyrkhat shaphang ki jingeh jong ki briew ba ki iarap hynrei ki nym don ki sap ban iarap pade ha ki jait jingshitom khlieh kiba donkam ka jingtih bniah ia ka daw jong ki khamtam haba iadei bad ka “in-depth analysis” ia ka “mental, behavioral and psychological state” jong ki briew.
Ngi dei ban kynmaw, ba kine baroh Ar jait ki jait kam, kidei ban Trei lang bad snoh kti lang ia mynta ka jingbha ka imlang sahlang. Ka long kaba sngewsih ba ngi hap da thoh shaphang ki jingiapher tang namar ba ki Riew Sorkar bad kiba ai kam ia ki counsellor bad social worker kim tip lane kwah tip ia ki jingiapher ha ki rukom treikam ki jong ki.

Mano ki Counsellor?

Ki bun jait ki kyrteng ba la ai ia ki counsellor bad ki shong ha ki jaka trei ki jong ki.
Ki School Counsellor bad ki Guidance Counsellor kidei kita kiba trei hapoh ki Schools, ki Jaka Ri khun Swet (orphanage) bad ki iarap ia ki khynnah ha ki jingeh ba ki shem man ka sngi lada ia lade lane ha iing ha sem, ki jing eh bad ki jingpule bad ban iarap iaki ban pyrkhat ia ka lawei ka jong ki lyngba ki individual counselling bad career counselling.
Ki Marriage Counsellor kidei kita kiba la pyntbit ialade ban trei bad ki jingeh ki shi jur lane shi lok khamtam haba iade bad ka jingiadei ka jong ki.
Ki Mental Health Counsellors ki iahap bha ka rukom trei bad ki Clinical Social Worker namar baroh ar kli iadei kam ba kito kiba shem jingeh khamtam haba iadei bad ka Mental health lane ka bor jingmut jingpyrkhat ka jong ki. Ki trei ha ki hospitals bad kiwei de ki jaka ai sumar ia kito kiba lah dion jingthut ha ka bor pyrkhat.
Kiwei dei ki jait counsellors ki dei ki Career Counsellor –kiba lah pyntbit kyrpang ban iarap ha ki jingpule bad ki kam ki jam, Ki Rehab Counsellor – kiba trei kyrpang bad kiba lah ngat ha ki kam kyrni ba bun jait bad kiba trei bad ki jaka sumar kum ki rehabilitation center, Ki gerotological counsellor – kiba trei kyrpang bad ki riew tymmen kiba lah noh ka met bad ki jingeh ki jong ki.
Ban long Counsellor ba lah tbit, ka jingdonkam kaba rit tam ka dei ka Bachelor Degree ha ka psychology bad nangta kiba dang kwah pyntbit shuh shuh ki lah ban leit nangta. Kito kiba kwah bad thmu ban trei bad kiba don ki Mental health Problems lane kiba don ka jingduna ha ka bor pyrkhat ki hap ban don ruh ka Master degree bad ar snem ban trei ka jingpeit jong ki Psychiatrist.
Ka Rukom trei bad ka kamram jong ki Counsellors bad ki Social Workers, ki lah ban i syriem bha, bad bunsien ki kam ki ia tyngkhuh bad ki ia syrtap hajuh. Hynrei kata ka jingiatyngkhuh ka long kaba donkam namar ba kine ki ar jait ki kam ki dei hi ruh ban ia trie lang hajan- hajan ia ki kam ki jong ki. Hynrei, watla ki iajan, ka don kawei ka jingiapher kaba pynphiah shisha ia ka rumkom trei ka jong ki bad kata ka dei ba kumno ki pyndonkam ia la ki jingshah hikai bad la ki atiar haba iarap ia ki nongpang/ ki briew donkam ha ki jingeh ki jong ki –

Nyngkong eh ki Counsellors kim ju ai “Advice” lane bthah hynrei ki iarap ban wad ki lad ki lynti ( facilitate pathways) ha ki rukom pyrkhat ( rational thinking) ban shem ia ki jubab lane lap ia ki rukom leh ( facilitated solutions) kiba ki nongwan sumar hi ki lap (self realisation) bad kiba ki lah ban pyntreikam hi da lade (self control) ban pynbeit ia ki jingwit bad jingthut ha ka jingim ki jongki khlem da pynthut lane pynkhih ia kiwei pade ki jingdon ha ka jingim ka jongki. Ki Social Workers pade ki wad ki lad ki lynti bad kin bthah ia ki briew ban pynbeit ia ka jingeh ka jongki kaba hakhmat. Ki pynbeit bad pynkhih wat ia ka jaka lane rukom im ka jongki (altering a client environment) ban poi sha ka thong ba ki dei ban poi khnang ba kin lah ban iarap ia kita kiba donkam ka jingiarap. Bunsien, ki ju don jingiadei bad ki nongai bylla bad kiwei de ki seng kiba lah ban iarap ban pynsuk ia ka jingeh jong kita kiba ki iarap bad hangta ki lah ruh ban pynkylla bak la bak ia ka rukom im jong ki.
Kiwei de ki jingiapher ki kham long ‘Technical’ kum ki “Ethical Code of Conduct” kiba baroh ki counsellor kidei ban bud, kiba iade bad ka aiǹ shaphang ka ‘confidentiality’ bad ter ter kiba kdew shai ia ki jingtbit bad jingiapher hapdeng kine ki ar jait ki rukom trei kam.

Haba long ki Counsellor kiba lah pyntbit bha ia lade, ka plie lad ia phi ban sumar bad ban ‘diagnose’ ia ki jingpang ka rukom pyrkhat (mental health disorders), ban ai ki jait jingsumar lyngba ki ‘Psychotherapeutic Methods and techniques’ lane ki jingpyntbit ba kyrpang lyngba ka subject Psychology bad kum kit kiwei de kiba ki Social Worker ki nym lah, hynrei, ki social worker pade ki lah ioh ka jinghikai ban leh ki jait counselling kiba kloi (brief intervention counselling), kiba ai ia ki nongpang ia ki jingtip ba har rukom (provides information counsel) , bad kiba lah ban phah ia ki briew (khynnah bad rangbah) sha ki jaka sumar bad ki briew ba ai sumar bapher bapher (Referrals).

Baroh Ar kine ki jait jingpule bad jait trei kam, kilong kiba donkam shisha khamtam ha ki kam sorkar haba ki pyrkhat ia ki plan bad schemes bapher bapher ia mynta ka jingbha ki briew, lane ha ki jaka sumar bapher bapher kum ki CHC, PHC, Civil Hospital bad ter ter bad ruh ha ki kam ka Pule ka Puthi namr kine ki don jingiadei bad ki jingim jong ki briew. Hynrei kaba sngewsih ka long ba baroh Ar, ki shah kheǹ beiǹ bad shah ǹiew beiǹ ha ka sokar kmie bad sorkar jylla bad ia ki hok treikam jong ki ruh ym shim la pynbiang. Ha Meghalaya, Hato don ka jing shah kheiǹ kumjuh ka Rukom trei kam jong ki Ark am kiba pher? Hooid, Hangne ha jylla jong ngi lei lei ka Jur bha kane ka rukom leh.

 Kumba lah batai shajrong, ka kam jong Ki Trained Counsellor bad ki Social Worker ruh lah pynbakla. Kiwei pade ki kynthup, ia ka kam ki Psychotherapist bad ki occupational therapist. Ki psychotherapist ki dei ki counsellor kiba lah leit pyntbit ha ki Psychotherapy bad kine ki lah dei kita ki counsellor bal ah pyntbit ha ki kam syllok. Ki Occupational Therapist pade ki ba iarap ha ka jingsumar ki briew kiba lah ngat ha ki jingpang lane ki accident ryngkat ki doctor, ban hikai ia ki ki jait akm kum ki ba shna jing shna (craft work), ki thung jingthung (gardening), ban leh exercise, ki jingrwai bad ter ter.
Ki nym lah ban sumar haba iadei ia ki nongpang kiba donkam ban iasyllok janai (psychological issues) namar iaki khlem da hikai ha kita ki ‘Psychotherapies’. Ki dei ban trei kam ryngkat ryngkat bad ki counsellor kiba lah pyntbit bha ia lade ha ki subject psychology bad ryngkat ki lah ban iarap ia ki nongpang. Ki Community Health Worker ruh lah ju shem ba ki hap leh ia ka kam counselling ha ki hospital bad health program watla kim shim dei kita kiba lah pyntbit ha ka kam counselling. Dei ha kum kine kein bas a mih kita ki “advice givers” lane kiba shu ai jingbthah ki kam ban leh khlem da lah ban leh Counselling namar lah khnang tyngeh ha ka kam counselling ban shu ai “Advice”.

 Lah ju iohi ruh ba ki Nonghikai bad ki Principal jong ka skul ki hap leh counselling. Watla, ym don ba lah ban knieh noh na ki ia kata ka jingkordor ka jongki haba iadei bad ka jingim ki khynnah, bad la iohi ruh ba don kiba la leit pyntbit ialade ha ki rukom leh counselling, ngi sngewthuh pade ba kata ka long ka bym shim dei ba u/ka nonghikai kin long bad nongbishar bad nongiasaid ha ka jingeh ki khynnah. Kine ki hap ban jied noh lada ki kwah ‘hikai’ ne ‘syllok’.

 Ki Doktor bad ki Nus kum ki Counsellor. Ha Meghalaya, ka don ka jingsngewthuh bakla ba kine ruh ki lan ban ia syllok lane counselling. Kadei kaei kaei kaba shai ba kine hi ki nym shim lah ban iadei bad ki jingeh jong ki nongpang haba iadei bad ki “psychological issues” ki jong ki nongpang. Hooid ki don ha ka kam kaba ai jingsumar bad jingkyrshan hynrei kata kam shim lah ai ia ki ka jinghikai lane jingtbit ha ka kam counselling.

 Ki don ruh ki por ba ki Counsellors, ki kylla long pynban ruh ki social worker, ki Dietician (ki briew ba bthah ia ka rukom bam), ki Data Entry Operator bad ter ter tang namar ba kita kiba dei ki nongaikam (Govt, Private, hospitals) kim shim kwah ban sngewthiuh lane tip ka don jin g ia pher ioh ki hap thung kam kham bun ki nongtreio bad kata kan kthah ia kip la ki jong ki.

Hato lah ban long Counsellor lada leit shwa da kiwei ki jait jingpule?
Hooid lah, don ka lad ba kiwei ki lah ban jied ban long counsellor watla ki pyndep shwa ki jingpule ha kiwei ki subject. Kine ki briew kiba don ka jingthrang ban long Counsellor, ki hap ban leit pyntbit ia lade ha –
1. Hap ban dei na ki subject kiba ai jingsumar ia ki parabriew bad kiba pule shaphang ban iarap ia ki briew kum ki social work, nursing, human development, human resource bad ter ter bad lada kim dei ki hap leit shwa ia kine ki subject.

2. Ynda ki lah dep, ki hap ban leit ia ka training course ka bym duna ia ka Shi snem ha ka counselling/ psychology/ psychiatry kum ka “specialisation’
Nangta ki la lah ban trei kum ki counsellor hynrei kan bha lada ki don hapoh jong ki psychiatrist lane ia trei ryngkat bad kito ki briew bal ah pyndep ki jingpule lynba ki psychology bad kiba lah long jingpyntbit ha ki psychotherapies.

Haba kut, ha Megahlaya, ka jingpyrshang ban ithuh ia kita kiba lah pyntbit ia lade ha ki jinghikai counselling bad psychotherapeutic techniques kam don. Donkam ban sdang ban pynsngewthuh ia ki briew ia ki jingiapher shwa ba kiwei pat kiei kiei kin kylla.
Ka Trained Psychotherapeutic Professionals of Meghalaya (TPPM), ka seng bal ah mih kyrpang na bynta kito kiba lah pyntbit ia lade ha ki kam counselling, ka la sdang pyrshang ban pynsngewthuh ia ki briew. Hooid kan jynjar namar ki maw jingthut ki bun, khamtam haba kita kiba lah dep ki jingpule na ka psychology bad counselling kim shim lah mih shakhmat bad ki sheptieng iaoh ki shah knieh ki kam ki jam namar haba ngi mih bad Tur, ngin tur pyrshah ia kata jinglong bad ia kita ki briew kiba lah pynklumar bad pynlymwir ia ka kam counselling ba kan kiew bad ba la khanglad ba kan iarap ia ka imlang sahlang ha ki jingdonkam ki jong ka.

 

Raiot

Subscribe to RAIOT via Email

Enter your email address to subscribe to this blog and receive notifications of new posts by email.

Join 15.7K other subscribers
Roney Lyndem Written by:

Roney Lyndem works as counsellor and is a Union activist with Thma U Rangli Juki (TUR)

Be First to Comment

Leave a Reply