Ka Dorkhas Halor ka Jingiakhun Pyrshah ia ka Khlam COVID19

Shillong 22 Lber 2020

Ha
Mr Conrad. K . Sangma
Myntri Rangbah,
Ka Jylla Meghalaya.
Shillong.

Subject: Ka Dorkhas halor ka jingiakhun pyrshah ia ka khlam COVID19

Myntri Rangbah ba don burom,

Na ka liang ki nongtrei nongbylla ka Jylla ngi ai khublei bad phah ka jingkyrkhu kyrdoh ia phi bad ia ka Sorkar jong phi.

Ma ngi ki nongtrei nongbylla hapoh ka shatri jong ka sengbah ki nongtrei nongbylla, kata ka Workers Power of Meghalaya, ngi ia snoh kti lang bad ai ka jingkyrshan ia ka Sorkar ha ka jingiakhun pyrshah ia ka khlam COVID 19 ne kata ka Corona Virus kaba la sar bad saphriang satlak ka pyrthei. Ngi ngeit skhem ba dei tang ka jingiatreilang da baroh ki nongshnong shnong bad da kaba jam ruh ia u pud ka pyrkhat shimet ne ka khwan myntoi ba ngi lah ban jop ia kane ka thma bad ngi lah ruh ban pynneh ia ki nongrim tynrai ka imlang sahlang. Lada ki nongshong shnong ne ka imlang sahlang kim shngain ym don uwei ne kawei ruh na ngi ki riewshimet ki ban shngain. Lada ki rangli ki juki, kiba duk ba kyrduh, ki nongtrei nongbylla ki bym don ki lad jingiada kiba biang kim lah ban sumar bad iada ialade shen kane ka khlam ka lah ban sar naphang bad khlem pep kan lynshop ia ngi iwei pa iwei. Ka jingpynthikna ba uwei pa uwei ne kawei pa kawei ki nongshong shnong bad ki nongtrei nongbylla ki ioh ia ka jingkyrshan kum ka bai bylla sngi bad ka jingpynthikna ba uwei pa uwei ne kawei pa kawei ki ioh ka jingiarap kaba stet bad ba paka lada jia ba ki shitom ne kem pang, kan long ka jingiarap bakhraw ha kane ka jingiakhun bad kan pynlah ia baroh la uba duk ne ba riewspah ban bud pyrkhing bad ryntih ia ki jingbthah ki tnat Sorkar ban shong khop ha la iing bad ban kiar na kaba ia mih na iing ban leit sha ki jaka paidbah ne jaka trei.

Ma ngi kum ka kynhun ki nongtrei nongbylla ngi ngeit ba don ar tylli ki thong ha kane ka thma pyrshah ia ka khlam Corona, kita ki long, wei ban iada ia ka jingim briew bad ar ban iada ia ka jakpoh bad ka kamai kajih. Baroh ki jingpyrshang jong ngi bad jong ka Sorkar kin pulom lada ngim sngewthuh ia kane bad lada ngim lah ban iada ia ka jingim bad ka kamai jakpoh ki briew. Namarkata ka daw ngi buh ha khmat jong phi ia kine ki mat harum bad ngi kyrpad ba phin shim khia ia ki bad ban kynthup lang ia ki ha ki mat treikam bad ki plan jong ka Sorkar Jylla ha kaba iadei bad ka jingiakhun pyrshah ia ka khlam Corona:

  1. Ban buria ia ka kamai jakpoh jong ki nongtrei nongbylla sngi kiba ha Sor, ki nongdiemadan bad ruh ia ki nongrep ha ki shnongkyndong kaba la duh noh na ka daw ka jingkhang ia ka iew ka hat, ka iaid ka ieng bad ka trei ka ktah da kaba thep pisa ha ki bank account jong ki katkum ka dor bai bylla sngi ba la pynmih da ka Sorkar Jylla. Kawei kawei ka longing ka dei ban ioh bai buria ym duna ia ka dor bai bylla sngi ba la buh da ka Sorkar Jylla na ka bynta ki sngi ba ki la duh bylla.
  2. Ka jing kyrshan ia ki longiing lyngba ka jingsam ei ia u khaw rashon bad kiwei ki mar bam rashon na bynta ki BPL.
  3. Dei ban kham pynbun ki marbam mardih ha ki dukan rashon khnang ban lah ban die sha baroh ki nongshong shnong ha ka dor kaba jem.
  4. Ki nongrep kiba shim ram lyngba ka Kisan Credit na ka bynta ka rep ka riang kum kaba rep jhur ki dei ban ioh jingiarap da kaba pynsangeh ne pyndam noh ia ka sut jong ka ram bad ruh ban shah ia ki ban siew suki pa suki tat haduh ba kin da lah ban pyndep katkum ka bor bad jinglah jong ki.
  5. Baroh ki nongtrei muster roll/ kiba trei kum ki work charge/ki nongtrei contractual/ki nonghikai ha ki skul private/ki nongtrei ha ki dukan bad kiwei ki dei ban ioh ka bai bylla na ka bynta ki sngi ba kim lah ban leit trei namar ka jingkhang ia ka iaid ka ieng bad ka trei ka ktah.
  6. Kino kino ki jingshitom kiba ktah ia ka jingring bad jingpynhiar mynisem ne ka jingsuba ba ka lah ban dei ka jingpang Corona ba ki briew ki leit pyni sha Hospital ne ki hap ban sah ha Hospital, ia ki jinglut jingsep kiba kum kita ym dei ban khate na ka Health Card (MHIS) ba ka Sorkar Jylla ka ai sha ki nongshong shnong hynrei dei ban ai ei ia ka jingsumar bad ai ei ia ki dawai bad ki tiar ki tar ba donkam ban iarap ia ki ba ioh pang corona.
  7. Dei ban don ki jaka thet kti kiba paka ryngkat bad ki sabon ne sanitizer ha baroh ki iew bad jaka paidbah.
  8. Ba ia ki jingbam sngi ba ju ai sha ki khynnah skul bad kiwei de lyngba ki anganwadi dei ban pynpoi ha man la ki thliew iing.
  9. Ban ai ki jingbatai kiba shai bad ba bniah halor ka khlam bad ruh ban pyntip bad batai shai halor ki lad ki lynti bad ki rai ba la shim ban iakhun pyrshah ia ka khlam. Baroh ki rai sorkar halor kane ka khlam corona ki dei ban long kiba shai ba khuid bad ba saphriang sha ki paidbah.
  10. Dei ban ai ka jingkyrshan kaba pura ia baroh ki nongtrei ka tnat ka koit ka khiah la ka long kiba trei Sorkar bad ki bym dei Sorkar. Ka jingkyrshan ka long lyngba ki jingai ne jingsiew bad kumjuh ruh ban pynbiang ia ki tiar ki tar, ki jingda khmut da khmat kiba biang, ki jain phong kiba paka bad ki lad jingiada ia ka jingim jong ki.
  11. Dei ban kynshait dawai pyniap khniang jingpang ym tang ha ki jaka ba hap hapoh Municipal hynrei ha baroh ki shnong bad ki shnat.
  12. Dei ban kem bad pynshitom ia kino kino kiba pynsaphriang ia ki khubor lamler bad kiba ibein ia ki briew kiba la ngat ha kane ka jingshitom.
  13. Dei ban teh lakam mardor ia ki nongdie jingdie bad ki nongkhaii marbam bad ia kiwei de ki mar kiba kongsan ba kin ym shim kabu bad die palat ia ka dor ba la buh. Ia kiba pynkhein dei ban pynshitom jur katkum ka Ain.
  14. Dei ban khanglad ia kino kino ki seng ne ki seng niam kiba thmu ban pynlong kino kino ki jingialang paidbah.

Kum ka kynhun ki nongtrei nongbylla bad kum ki nongtrei nongbylla kiba iakhun iaksaid man la ka sngi ban kyrshan bad pyndap ia la ka jong ka jingim, ngi angnud ban iatreilang bad iashim bynta lang ha kane ka thma pyrshah ia ka khlam Corona ha ka Jylla. Ngi kloi ban iatreilang bad ban iarap ban sam paidbah ia ki jingtip kiba dei bad kiba bniah bad ruh ban iarap ban thaw ia ki lad ban nang pynkhlain shuh shuh ia ka jingiakhun da kaba iarap ban hikai ia ki para nongtrei bad para briew ban bud ryntih bad pyrkhing ia ki jingbthah ka tnat Sorkar ban kiar na kaba ialum paidbah bad ruh ban hikai kumno ban sumar khuid ialade.

Ma ngi ki nongtrei nongbylla ka Jylla ngi iadon ryngkat bad phi bad da ka jingiawanlang bad iatreilang ym artatien ngin jop ia kane ka thma.

Khublei shi hajar nguh.

Kiba burom ia phi,

Mantre Passah
Co-ordinator (Thma U Rangli Juki)

Kenneth Swer
Secretary
(Workers’ Power of Meghalaya)

 

Raiot

Subscribe to RAIOT via Email

Enter your email address to subscribe to this blog and receive notifications of new posts by email.

Join 15.7K other subscribers

Be First to Comment

Leave a Reply