Ka Jingmudui Pyrshah Aadhaar Na Meghalaya Ha Supreme Court

Naduh ka 17 tarik u Kylla Lyngkot 2018 ka Constitution Bench, kaba kynthup ia ki san ngut ki Nongbishar ba la thung da ka Supreme Court ka la shong ban ai ka jingbishar kaba khatduh halor u Aadhaar Number. Ha ka sngi kaba 7, kata ka 6 Rymphang 2018, ha ka jingshong bishar u Shyam Divan u Nongiasaid Ain uba iasaid na ka bynta ki nongmudui kiba pyrshah ia u Aadhaar, kaba kynthup ruh ia ka Meghalaya Peoples’ Committee on Aadhaar, u la buh ia kane ka jingkylli ha khmat ki Nongbishar; Hato ka met ka phad bad ka longrynnieng jong u briew bad ka briew ki dei ki jong no? Ki dei jong u ne ka briew shimet bad tang ma ki hi kiba long trai bad pyniaid ia la ka jong ka met bad ka long rynnieng? Ne ki dei jong ka Sorkar? Lada ki dei jong ka Sorkar kata te ka mut ngi im ha ka juk jong ka synshar leh donbor bad leh jubor?


Ka jingiasaid bad ka jingbishar ba khatduh halor ki jingmudui pyrshah ia u Aadhaar Number ka la nangiaid shaphrang bad kaei ka rai? Ym pat lah ban ong ia mynta hi namar ba ki san ngut ki Nongbishar ba don burom kin dang sngap bad bishar halor ki nia na baroh ar liang mamla bad kin sa bishar da kaba pynshong nia katkum ki nongrim jong ki Ain bad ka Riti Synshar ka Ri.

Niuma, kane ka sngi kaba 7 jong ka jingbishar kan long kaba sah jingkynmaw ha ka History jong ka jingiakhun pyrshah ia u Aadhaar hangne ha ka Jylla Meghalaya namar dei ha kane ka sngi ba u Sham Divan u la pule bad iasaid ha khmat ki Nongbishar halor ka jingmudui , lyngba ka affidavit, (pule ia ka Affidavit ba la suh lang hangne) jong ki 1564 ngut tam ki nongshong shnong ka Meghalaya kiba la thoh sha ka UIDAI ba ka dei ban pyndam noh ia u Aadhaar Number jong ki bad ban weng noh shi syndon ia ki jingtip shaphang jong ki na ka thup lum jingtip jong ka UIDAI ne na kino kino ki thup lum jingtip kiba ka ka UIDAI ne ka Sorkar ne ki Private Company ki la pyndonkam. U Sham Divan u ong ba ka jingdawa jong ki nongshong shnong ka Meghalaya ban weng noh ialade na ka thup lum jingtip bad ba ka UIDAI kan pyndam noh ia u Aadhaar Number ka long kaba kongsan bad u la iasaid ba dei ban ai ha ki nongshong shnong ia kane ka hok ban pyndam bad ban weng ialade na u Aadhaar Number. Da kane ka pynpaw ba uwei pa uwei bad kawei pa kawei ka nongshong shnong ki long kynrad halor ka met ka phad bad ka longrynnieng la jong.

Ka Opt-Out Campaign ne kata ka jingiakhih hangne ha ka Jylla Meghalaya ban weng na ka thup lum jingtip ka UIDAI bad ban pyndam ia u Aadhaar Number kaba la lam khmat da ka Meghalaya Peoples Committee on Aadhaar ka la long kaba kongsan ha ka jingiakhun pyrshah ia u Aadhaar wat haduh ka Iing Bishar. Ki nongshong shnong ka Jylla Meghalaya ki la leh la ka bynta da kaba ieng pyrshah ia ki jingeh bad jingma kiba la mih bad ki ban sa mih na ka jingpyntreikam ia u Aadhaar Number. Ki dang don shibun bah bad da ki hajar ngut ki nongshong shnong kiba kwah ban weng noh ia lade na ka thup lum jingtip bad ban pyndam noh ia u Aadhaar number jong ki, hynrei namar ki daw kiba bun ka Meghalaya Peoples Committee on Aadhaar kam shym lah ban leit sha man la ki shnong bad ki thain ban lum lang ia ki. Ka jingshihsha pat ka long ba ki 1564 ngut tam kiba la dawa ban weng bad pyndam ia u Aadhaar jong ki bad kiba la mudui ha khmat ka Supreme Court, kine ki la mihkhmat na ka bynta baroh kito kiba kwah ban weng bad pyndam ialade na ka thup lum jingtip ka UIDAI. Ka jingiakhun jong ki nongshong shnong ka Meghalaya bad ka Campaign jong ka Meghalaya Peoples Committee on Aadhaar kam dei kaba shu sawa tang ha lyer, pynban kane ka jingiakhun bad ka Campaign ka long kaba kongsan bad ei ba tip ka lah lehse ban wanrah shibun ki jingkylla bad ba sa shisien pat ban pynioh bad pynskhem ia ki nongrim jong ka jinglaitluid.

Ka Meghalaya Peoples Committee on Aadhaar ka dei ka kynhun kaba kynthup ia ka Khasi Students Union, Thma U Rangli Juki (TUR) bad kiwei de ki riew shimet, kum Rev PBM Basaiawmoit bad kiwei.

Public Meeting of MPCA at Khasi National Dorbar Hall.
(From Left) Rev PBM Basiawmoit, Auguster Jyrwa (ex GS KSU), Rev Kyrsoibor Pyrtuh, Angela Rangad (TUR), Usha Ramanathan (Legal Researcher)

Raiot

Subscribe to RAIOT via Email

Enter your email address to subscribe to this blog and receive notifications of new posts by email.

Join 15.7K other subscribers
Raiot Collective Written by:

We are many, we are one.

Be First to Comment

Leave a Reply