Ka Jingpynsngew Bad Jingkyrpad Ia Ki Dorbar Shnong Bad Para Nongshong Shnong

Ka jingpynsngew bad jingkyrpad ia ki Dorbar shnong bad para nongshong shnong
  1. Ngi don ha ka por kaba jwat bad ka khep kaba eh bad ba kordit.
  2. Sa katno por ka jingsaphriang u khniang jingpang covid19 Kan neh?
  3. Halor u khniang jingpang te ai ki doctor bad ki riewshemphang kin hikai bad batai pynshai ma ki ia ngi.
  4. Hynrei kaei kaba ngi lah ban leh kum ka Dorbar shnong bad para nongshong  shnong ne ngin ia pyrkhat lang bad ban pyn khreh  lypa na ka bynta ki por kiba kham shitom ioh kumno re kumno ka wan hap kyndit kynsan ha ngi.
  5. Hoid ngi ia pyrkhat shimet shimet bad shi iing shi iing bad ka long kaba dei. Hato ngim lah mo ban jam shabar u pud shimet ban ia pyrkhat lang kum ka shnong ne kum ki nongshong shnong? Namar ka jingkoit jingkhiah ne jingsuk jingtngen jong u ne ka para marjan ne para nongshong shnong ka dei ka jingkoit jingkhiah ne ka jingsuk jingtngen Jong ngi lang baroh.
  6. Kaei ba ngi lah ban pynkhreh bad leh lada wan jia ki  por kiba kham shyrkhei?
  7. Ka sorkar jylla bad sorkar India ki la pynbna bad khang ia ka jingmih paidbah shabar na iing ha ka 21 bad 22 tarik mynta u bnai.Lehse kane ka long ka jingsdang bad ei ba tip lada jia ba ka jingpur ne jingsaphriang ka nang jur ka lah ban poi ka por ba hap ban khang kut hapoh iing ia ka jingim briew da ki taiew.
  8. Lada khang trei khang bylla bad khang iew da ki taiew kan long ka jingduh.
  9. Ka kamai kajih khamtam eh ki nongbylla sngi bad kan long ka jingkyrduh kaba jur ia ki bad lehse kin don ki briew ki ban ym lah ban ioh ka bam wat tang shisien ruh.
  10. Hato ym long mo ban ia pyrkhat lang yn leh kumno na ka bynta kum.kita? Lada ngi iapyrkhat lang ban don ka jinglum jingbam bad buh da ka shnong bad ki rangbah dong ne ki samla shnong ne mano mano ha man ki kyntoit kin wad jingtip bad lada don kiba kum kita ka shnong kan sam bad bsa da ki jingbam kaba ngi ia kynshew lang. Bad iakane dei ban leh khlem da niew ne pyniapher jaidbynriew.
  11. Ki briew ki kem pang ym tang namar une u khniang jingpang covid19. Hynrei ki don bun bah ha ki shnong Jong ngi kiba donkam ka jingsumar kaba man la ka sngi. Ka nuksa kiba pang shini bad pang blood pressure kiba donkam ban leit check up man ka sngi ne man ka taiew.Nangta sa kiwei ki jingpang ka prie ,pynhiar, ka shitmet etc kiba ki  briew ki donkam jingsumar. Ha kum kane ka por kaba eh bad lada jia ba hap ban khang dam ia ka iaid ka ieng ki briew da ki taiew  bad lada jia ba wan ka por ba ki hospital Jong ngi ki shlei da kiba ioh ia u khniang covid19 bad kan long ka jingeh ia kiwei pat kiba don da kiwei pat ki jingpang ban iakhleh lang ha hospital. Kum ki nongshong shnong bad ki dorbar shnong ki lah ban pyrkhat bad pynkhreh lypa bad kyrpad ia ki doctor kiba laitluid ba kin iarap lem ha shnong ban peit bad khmih ia kiwei pat ki jingpang bad ki nongpang kum kiba pang shit ,suhkpoh pang shini ,blood pressure bad kumta ter ter bad ka shnong kan iarap ban lum lypa ia  ki dawai hapoh ka jingpeit jingkhmih ki doctor. Ia kane ruh yn lah ban leh ne  iarap ia baroh khlem da pyniapher jaitbynriew.
  12. Ka shnong ka lah ban kyrpad ia ki nongdie ia ki marbam kiba don hapoh shnong  ban ym shim Kabu bad ruh ki nongshong shnong haba ki thied lypa ia ki marbam kin pyrkhat lem ia kiwei khamtam eh ban pyrkhat na ka bynta kito ki bym don pisa bad ki bym don jaka ban thied ne ban buh lypa ia ki marbam.
  13. Ka tnat ka koit ka khiah ka hikai ba kawei  na ka jingdonkam ba kongsan ha ka jingialeh pyrshah ia une u khniang jingpang ka dei ka jingleh khuid bad kaba thet khuid ia ki kti da ka sabon ha ka um kaba tuid kylluid na ka kor um.Kumta ka long kaba kongsan ba ki Dorbar Shnong kin khmih bniah ba ki longiing baroh  hapoh shnong ki ioh um thikna bad pahuh man la ka sngi bad lah ban ia pyrkhat ruh ia ki lad ban sam um thikna bad kylluid sha man la  ki longiing hapoh shnong khlem leh shilliang khmat iano iano ruh.
  14. Lada ha ki shnong bad Dorbar shnong ngi lah ban ia pyrkhat lang bad pynkhreh lypa na ka bynta  ki por kiba kham eh ki ba lah ban jia kan long ka jingiarap wat ia ki bor sorkar ruh. Ka shnong ka lah ruh ban wer ia ki samla kum ki volunteer ki ban iarap lang ban kyrshan ia ki para nongshong shnong.
Ha kum kane ka khep to ngin ia ieng lang ha kane ka nongrim
ka iing Jong nga kan iarap ia ka iing Jong phi
Khublei

Have your say

comments

Raiot

Subscribe to RAIOT via Email

Enter your email address to subscribe to this blog and receive notifications of new posts by email.

Join 14,054 other subscribers

Kyrsoibor Pyrtuh is a pastor interested in intersection between theology and social power

One Comment

  1. Avatar
    Bah Stenis Pyngrope,Rangbah Shnong Laitkor Rngi Shlg.
    March 22, 2020
    Reply

    Nga ai khublei kyrpang ia phi iakito ki mat ba kongsan tam ba phi aijingmut ia baroh ki Dorbar Shnong ba ngi dei ban leh noh khlem buh teng
    Khublei shibun eh Pastor bad to U Blei Trai Kynrad Un nang iai kyrkhu ia phi bad ki ba ha ing baroh.

Leave a Reply

This site uses Akismet to reduce spam. Learn how your comment data is processed.