Ka Risa Lehkmen Khristmas Jong Ki Nongtrei-Nongbylla, Balei Ba Ka Long Kaba Pher?

Kiba iaidkai ne leit thied jingthied sha Khyndai Lad ha ka 21 Nohprah 2015 ki iohi ia ka Risa Lehkmen Khristmas ba la pynlong da ka Seng ki Nongtrei-Nongbylla, ka Nazareth Hospital Workers Union, ha ryngkat ka jingiasnoh kti lang ka Thma U Rangli-Juki, Ka Domestic Workers Movement, Ka All India Trade Union Congress bad kiwei de ki kynhun ne ki riewshimet, kaba kynthup ruh ia ki nongrwai, ki kaitor, ki kynhun shad kiba la ai ka jingkyrshan kaba pura bad pynlong ia ka Risa Lehkmen kaba don jingmut.Shisien peit ka Risa Lehkmen Khristmas jong ki Nongtrei-Nongbylla I kumba ka long kaba lynruh lynram bad ka bym bit bym biang, hoiod ka I lynruh lynram shisha namar ka jaka ba la pynlong ia katei ka Risa Lehkmen ka dap da ki maw saling, ki shyiap bad don ruh sa ki thuk thuk kiba ieng na khmat bad na kynriang. Lehse ioh don ruh kiba iaid lyngba na katei ka jaka kiba pynran khmut pynran khmat haba ki iohi ba ki Nongtrei-Nongbylla ki shad ki risa kmen ha u Jisu Khrist u riewiakhun na ka bynta ka koit ka khiah, ka bai bylla, ka kamai kajih, ka jingshngain ki riew kynthei bad ka hok longbriew manbriew jong ki kup shilliang ki sem shilliang. Lada thew da ujuh u dieng kot ka phuh ka phieng ne ki jingthaba ba ngi ju iohi ha kiwei pat ki tamasa lehkmen (festivals/concerts) kiba ju long ha ka Nongbah Shillong, ka Risa Lehkmen Khristmas jong ki Nongtrei-Nongbylla kam iaryngkat bad ka iapher bak lybak. Ka Risa Lehkmen jong ki Nongtrei Nongb ylla kam shym long kaba phuh ba phieng namar ka rynsan lehkmen ka long kaba synlar, kam don ki jingpynshai-pynthaba ding ne ki tdem ba bun rong, kam don ki jingpynriam pynbeit bad kam don satia ki shap (Logo) jong ki nongbei tyngka namar ki Nongtrei-Nongbylla da lade hi ki kyrshan bad pyndap ia ki jingdonkam baroh.

Balei Ba Ka Long Kaba Pher?

Ka Risa Lehkmen Khristmas jong ki Nongtrei-Nongbylla ka long kaba pher namar kine ki daw harum:

• Ka jingthmu jong ka, ka long ba pynbna paidbah ia ki hok jong ki Nongtrei-Nongbylla bad ia ki kamram bad jingkit khlieh jong ki nongaikam bad kumta la sam ia ki kot lyngkdop ba la pynkhreh khnang ba ki paidbah kin tip ia ki hok jong ki nongtrei-nongbylla.

• Ka jingthmu kaba ar ka long ban pynsngewthuh paidbah ba ha kane ka juk ki Nongtrei-Nongbylla ki shah ban bein bad shah lehbein ha ki rukom bapher bapher. Ka bai bylla kaba shi dana bad ba poh dor (Below Minimum Wage), ki kynta treikam ki long 12 haduh 15 kynta shi sngi, kaba long be-ain bad don ki jaka treikam ki bymsuidniew ban siew bainong ia ki kynta ba ki Nongbylla ki trei tam, ka jingbymshngain ki kynthei ha ki jaka treikam bad ka jingbym don ki lad jingkyrshan, kum ki jaka Ri khunlung ne kiwei ki lad ha ki Kharkhana, ki Hospital ne kiwei de ki jaka treikam khnang ban iarap ia ki kynthei kiba kha ba pun, kiba ai buin ai bam ia la ki khun rit. Ka rukom thung kam kaba tang shipor (Contract Basis) bad kane ka dei kawei na ki jingeh kaba khraw tam kaba ki samla wadkam ki iakynduh ha kane ka juk. Kane ka rukom thung kam ba shipor ka wanrah ia ka jingtieng jingsyier bad ka jingbym thikna ha ka jingim. Ia kine baroh la pynsawa bad pynsngew ha ka Risa Lehkmen Khristmas lyngba ki jingkren bad ki jingrwai.

• Ka Risa lehkmen Khristmas jong ki Nongtrei-Nongbylla ka long kaba pher namar ka don ha ka ia ka sainpyrkhat (Ideology) bad kane ka sain pyrkhat ka phalang ha ka theme jong kane ka lehkmen kaba long kumne, “Ngi ia Risa bad U Jisu Khrist,U Khun jong u Misteri, U Nongbylla, U Riewiakhun, U Nongiada ia ki hok jong ngi”. Ki jingkren bad ki jingrwai kiba ngi iohsngew ki tyllun talwiar kane ka theme bad ki kyrsoi na kane ka sain pyrkhat. Sawdong ka jaka ba la pynlong ia ka Risa Lehkmen ki nongtrei-nongbylla ki iakren -iakhana halor ki jingeh ba ki mad, ki iakren ruh shaphang ka jingkyrmen ba ki don haba ki iawan lang kawei hapoh ka Seng jong ki Nongtrei-Nongbylla bad ki sngewthuh shai kdar ba ki don ka bor ha ki kti jong ki. Ki shad, ki kmen, ki risa bad ki iarwai lang bad ki kaitor bad kane ka la nang ai mysiem shuh shuh ia ki ban iakhun ha ka jingim ne ha ki jaka treikam na ka bynta ki hok jong ki hi. Ki iarwai lang bad ka kynhun tem TARIK kaba la rwai bad pynkylla sha ka ktien khasi ia ka jingrwai jong U Joe Hill kaba kyrteng “Power To Union”, kaba mut “Don ka bor ha ki Seng jong ki Nongtrei-Nongbylla”. Nangta ki kyntien jingrwai na ka kynhun Cyrpto Graphik Streets Poet (CSP) kiba ong, “Workers Unite, Jesus is on our side” lane “Nongtrei-Nongbylla kawei to ieng tylli , U Jisu Khrist u don ha ka liang jong phi”. Kumne ka Risa Lehkmen Khristmas ka tuid ryngkat bad ka miet kaba dait thah tasam, pynban ka mynsiem ka rhem bad ka long skhem ban iakhun pyrshah ia ki bor kiba ban bein, kumba u Jisu Khrist u la iakhun ar hajar snem mynshuwa.

• Ngi im ha ka Ri bad ka juk haba ka jingphetwir jong ki briew na kawei ka shnong sha kawei pat ka nangjur. Ki briew ki hap ban phet wir namar ba ki shah knieh ka jaka rep, ka khyndew bad ruh na ka daw ka jingduk .Ki briew ki phetwir kylleng ki jaka tang ban kamai jakpoh. Ha ki Sor ne Sorbah kiba bun bah kiba wan phetwir ki im ja da kaba die jingdie ha madan madiah, harud surok, harud lynti bad ki die ia ki mar kutia mutia, ki shana, ki juti, ki jain, ki kwai dong, ki jhur, ki soh ki pai bad kumta ter ter. Ka jaka ba la pynlong ia ka Risa Lehkmen Khristmas jong ki Nongtrei-Nongbylla ha Khyndai Lad la ker sawdong da ki nongdie jingdie kutia mutia bad ki nongdie jhur ba shong madan kiba ju die man la ka jan miet ,bad teng teng ynda la kham miet ki wanrah ia ki mar ki mata jong ki hadien ba ki babu Magistrate jong ka East Khasi Hills District ki la leit phai sha iing. Hoiod, ym don ei ei ban kynthoh ia ki Ain Municipal, kam da donkam pat ba kiba donbor kin lynthem, kin lynthaw ia ki mar ki mata ne ba kin kynjat ia ki shana, ki kwai dong, ki soh bad ia ki jhur ha ka por ba ki beh ne khang ia ki nongdie madan (Hawkers). Ban jin lada ka Risa Lehkmen Khristmas ka dei kaba phuh ba phieng ne ka dei ka rong ka taw shi sngi bad ki briew kiba wan kin jin da la dei ki riewheh riewhain, ki Nongmihkmat ne Nongsynshar, kine kiba shong die jhur bad kiba ieng die jingbam ne kiba die wai dong kin jin da la shah beh krad bad shah khang lad ban ioh ia ka kamai miet jong ki (Night’s Earnings). Ha kiwei pat ki jinglehkmen (festival) ba ju long ha Khyndai Lad la ju shna kyrpang ia ki jaka bam bad shi slice u cake un shongdor 50 tyngka, katba ha ka Risa Lehkmen Khristmas jong ki Nongbylla, kiba ieng die jingbam ha Khyndai Lad ki la lah ban pynkdang ia ki paidbah da u chow, ka ja, ka pylleng ne u ata tang ha ka dor 10 haduh 30 tyngka. Kumta ha kane ka Risa Lehkmen Khristmas, I Rev Macdonald Pyngrope I ai khublei kyrpang ia ki nongdie jhur, ki nongdie jain, ki nongdie jingbam kiba shong madan namar dei ma ki kiba pynbiang ia ki jingdonkam bad die ia ki mar ki mata ha ka dor kaba bit kaba kiba duk ba rangli ki kotbor ban thied. Ha ka jingkren jong I, I ban shuh shuh ba ka Khristmas ia kiba duk ka long kumno ban im, kiba duk kim lah ban pyrkhat kumno ban lehkmen da ka khawai dawai ne ban thied ban pet na ki dukan paki-dulan.

 Ka Khubor Khristmas:

Ha ka por Lehkmen Khristmas ki Nongsynshar ki ia kren bha shaphang ka Jingsuk (Peace) bad la ju niew burom ia u Jisu kum u Syiem ka Jingsuk (Prince Of Peace). Niuma, U Jisu um dei u Syiem bad um dei ruh uto u khunlung uba iohthiah sah ha sem kulai, hynrei u la san u la rangbah, u la iakhun bad iap ruh halor ka diengphna na ka bynta ki nongtong dohkha, ki nongrep bad ki nongbylla. Ka jingkylli ka mih ruh kaei kata ka Jingsuk? Ha kane ka juk ia ka Jingsuk la pyniap noh da ka jinglah shilliang (Inequlaity) ha ka ioh ka kot bad ka kamai kajih. Ha kane ka juk ia ka jingsuk la knieh noh da ki bor kiba pynkylla phetwir ia ki briew ha ka kyrteng ka roi ka par (development). Ia ka jingsuk la pynthut noh da ki bor kiba pynduh ia ki hok jong ki briew ha ka koit ka khiah, ka pule-dangle bad ka trei ka ktah. Kaei ka Jingsuk na ka bynta kiba phetwir bad ki briew ki bym don ka tnum ban da na u thah rben jong ka tlang ne ki bym don ka khyndew ban shong ban sah? La knieh kynthet ia ka Jingsuk na ki kti jong ki bad ka Jingsuk kan ym lah ban ieng, khlem ka hok (Justice).

Ha ka por lehkmen Khristmas ka pyrthei ia ka kren shaphang ka Jingkyrmen (Hope), hynrei ka Jingkyrmen kam dei pat kata kaba ngi mutdur ba kan urlong ha ka Lawei ne ha ki por ki ban sa wan. Ngin ym lah ban phohsniew ba ka Lawei kan long kaba bha, lymda ngi pynbeit ia ki jingkynriang jong ka mynta. Ngin ym lah ban kyrmen ba ka Lawei kan bit kan biang, lymda ngi iakhun pyrshah ia ki bor kiba iuhroit ia ka hok longbriew manbriew ha kane ka juk ba mynta. Ngin ym lah ban kyrmen ba ha ka por ban sa wan ngin koit ngin khiah bha, lymda ngi iakhun mynta ia ka hok ban ioh ka jingkoit jingkhiah bad ki lad sumar pang ba paka. Ngim lah ban shu kyrmen ba ha ka Lawei, ki khun ki kti kin ioh ka pule dangle kaba bha, lymda ngi iakhun tyngeh pyrshah ia ki Policy treikam kiba mynta kiba pyrshang ban die duh ia ka Pule dangle ha ki riewshimet (Private Player) ne ha ki Seng kiba na sha bar Ri (Foreign Institution) bad kane hi kan knieh noh ia ka hok jong kiba bun bah ki khynnah bad ki samla ban ioh ia ka jingnang jingstad. Ngin ym lah ban kyrmen ba ha ka Lawei ki Nongtrei-Nongbylla kin ioh ka baibylla kaba biang briew bad ba kin ioh ruh ia ki hok jong ki, lymda ngi ieng bad iakhun mynta pyrshah ia ki bor kiba khnoit bein bad iakhun pyrshah ia ki Policy treikam kiba thmu ban pynkylla mraw ia baroh ki Nongtrei-Nongbylla. Ngim lah ban kyrmen ia ka Lawei ba phyrnai lymda ngi iakhun pyrshah ia ka jingdum jong ka juk mynta.

Ha kaba kut, ka Jerusalem ha ka por U Petros bad Ioanis (Ki Kam Ki Apostol) ka dei ka Nongbah bad ka Sorbah lane lah ban mutdur ba lehse kan dei ruh ka Smart City jong kato ka juk. Kumta ka khep ba U Petros bad Ioanis, ki nongbud u Jisu Khrist, ki iakynduh ha Jerusalem bad ki phetwir kiba wan sha Jerusalem, kiba wan wad bylla, kiba im khlem iing khlem sem, kiba shu khrong ne kiba shu shong madan ban kamai ja kpoh bad kumta ter ter. Ha ka khyrdop ban rung sha ka Temple kaba itynnad ki iashem bad kiba kum kita bad U Petros haba u iakren ne iasyllok bad ki, u la ong, “Ka ksiar, ka rupa ne ka pisa ngim don ban ai ia phi, hynrei ha ka kyrteng u Jisu Khrist uba Nazareth to ieng bad to iaid”. U Jisu u la im bad iakhun na ka bynta ki hok jong phi, jong nga bad ki hok jong ki nongbylla bad to ai ba ha kane ka Khristmas ngin ioh ia ka bor bad ka mynsiem ban iakhun.