Featured Image: Prisoners Exercising, Vincent Van Gogh
“(Nga dei u Jiw paka) …La ot sher ia nga ha ka phra sngi, na ka kynja Israel, na ka jait Benjamin, na ka hukum, u pharisi, shaphang ka jingshitrhem uba beiῆ ia ka Balang, shaphang ka hok…kaba na ka hukum, uba khlem jingrem”
Ka Ri Palestine ha ka spah snem ba nyngkong ka dap da ki jingjia kiba sah jingkynmaw bad kine ki jingjia ki shat phalang ruh ia ka jinglong ka imlang sahlang ha kato ka juk. Ki briew ha Palestine, ha ka spah snem ba nyngkong ki shem ba ka jingim ka long kaba jwat bad jynjar, ki Jiw ki shem їalade hapoh ka jingsynshar ki Kaisar na Rom bad ki Syiem, ki Basan, ki Bakhraw, ki Lyngdoh niam, ki Pharisi, ki Sadusi, ki Stad aiῆ bad ki Nongthoh jong ki Jiw ki la die їalade bad ia la ka mynsiem sha ki Kaisar ka Hima Rom. Ki la long tang ki tynghung ne ki tyngshop kiba shu pynsawa bad shad ha ki sur jong ki Kynrad na Rom.
Ka spah snem ba nyngkong ka dei ruh ka jingsdang ka Balang Khristan bad ka Balang ka bteng ia ki kam ba u Jisu u la leh- ka jingїalap ia ka Khubor Babha, ki kam pynkhiah bad kiwei. Ka Balang ha ki sngi kiba nyngkong ka dei ka kynhun kaba thymmai ha ka imlang sahlang- ka kynhun kaba mihpli ia ka imlang sahlang kaba rim bad kaba la pyut sniew, ka dei ka kynhun kaba їeng pyrshah ia ka jingrunar jong ki nongsynshar bad ia ka imlang sahlang kaba la їap ka jingiatiplem. Їa kane ka Kynhun Bathymmai la seng nongrim halor ka khubor babha u Jisu Khrist bad kane ka kynhun ka ngeit ha ka jingieit, ka jingїalong mar ryngkat ha khmat u Blei hakhmat u briew bad ka jingїasambynta lang khlem ka jinglah shilliang bad jingleh shilliang khmat.
U Apostol Paul u im bad treikam ha ka spah snem ba nyngkong bad ngi pule shaphang ka jingim jong u ha ka kitab ki Kam ki Apostol bad ngi tip ia ka saiῆpyrkhat theoloji jong u lyngba ki shithi ba u thoh sha ki Balang bapher. Ki don ki Khristan bad ki nongsharai Balang kiba ju mlien ban sot tang ia ki katto katne ki dkhot na ki jingthoh ba їar bad ba jylliew jong u Paul ban pynksan jubor ia ka jingpyrkhat bakhim jong ki. Ban ai nuksa – “Wat pyrshang ban їatreilang ryngkat bad ki bymngeit…Kumno uba ngeit u don bynta bad u bymngeit? (2 Korinth 6:14-15), la ju sot bad pyndonkam bakla ia kine ki dkhot ban pynrem bad khang pyrshah ia ki samla kiba їa-ieit bad thmu ban їapoikha bad ki bym long Khristan. Kumjuh ruh la ju sot bad pyndonkam bakla ia ki jingthoh u Paul ban kheiῆ riewbymman ia ki parabriew kiba ka jinglong shynrang ne jinglongkynthei ne jinglong ka met ka phad ka їapher na kiwei pat. Ha kane ka rukom la pynbakla ia ka Baibl tang ban pynksan ia ka jingpyrkhat ne jingngeit bakhim jong ki. Ka jingpule bakla bad jingpynksan jubor ia ka jingngeit bakhim ka long kaba mynsaw bad ka wanrah pynban ia ka jingsniew bad jingїaumsnam. Ha ka jingshisha ki jingthoh bakhraw jong u Paul ki dei ki shithi ba nyngkong sha Korinth 13 bad Philippi 2:1-11.
Ha shuwa ban long Apostol, u Paul u dei u Saul jong ka Tarsus bad une u Saul u peit bad їohi ia ki nongbud u Jisu Khrist da kiwei ki khmat; ki khmat kiba artatien, kiba tharai sniew bad kiba khim jingmut. Kumta u їaid kylleng ka Nongbah Tarsus bad kiwei ki shnong ban kren pyrshah ia ki nongbud u Jisu Khrist. U la pynkhih win bad їawer ia ki nongshong shnong ban pynsaja, ban pynshitom bad ban pynduh-pyndam shi syndon ia kane ka kynhun u Jisu Khrist. U Saul ka Tarsus u sheptieng shikatdei ia ka khubor babha bad ia ki kam jong ka jingieit. U їohi ba kane ka khubor babha ka long ka jingma kaba khraw ia ka niam bad kolshor Jiw kaba la pyut sniew ha kito ki por.
Katkum ki nongthoh history u Saul bad u Jisu ki їadei para rta, ki im bad ki heh, ki san ha ka spah snem ba nyngkong, uwei u lah ban shu tam ka rta ia uwei pat. Їa u Jisu la sahnarphna bad pynїap ha ka snem 30 HK, katba ka jingkylla jong u Saul bad ka jinglong Apostol jong u ka long hapdeng ka snem 31 bad 36 HK. Katkum ki riewstad Baibl, ki shithi u Apostol Paul sha ki Balang bapher bapher ki dei ki jingthoh ba nyngkong eh jong ka Kitab Bathymmai bad dei u Paul uba la thoh nyngkong shaphang u Jisu Khrist. Hynrei tang kawei u Paul um shym la thoh ei ei shaphang ka jingkha-jingpun, ka jingtrei bad jinglong briew u Jisu. Ym tharai pat ba u Paul un ym tip ei ei shaphang u Jisu.
U Apostol Paul u im ha ka por ka Hima Rom hyndai bad u la їohi ne mad ia ka jingsynshar donbor ki Kaisar kum u Augustus, Tiberius, Caligula, Cladius bad U Nero kiba la synshar hapdeng ki snem 27 haduh 68 HK. Na kine ki san ngut ki Kaisar, U Caligula bad u Nero ki dei ki Kaisar kiba runar tam. Ki synshar lahduh, ki leh donbor bad ki pynїap dusmon ia kino kino kiba їapher jingmut ne kiba їeng pyrshah ia ki. Ki pynmih hukum bad pynbor ia ki briew ban mane blei ia ki, ki pynkbum jubor ia ka shyntur jong ki nongshong shnong bad ki thaw ki aiῆ їakjakor ban teh ban khum bad pynsdot ia ki briew.
Ka pyrthei baroh kawei ka tip shaphang ka jingrunar u Nero bad dei u Tacitus u nongthoh history uba la thoh shaphang ki kam runar u Nero bad kawei na kita ka long ba u thang im ia ki briew na ka bynta ban pynphuh pynphieng bad pynthaba ia ka jingkhawai kaba u pynlong ha ka phyllaw їing syiem. La ki briew kim їohi shuh ia u Nero hynrei ki kam runar jong u ki dang pynsheptieng bad pynsuh jer ia kiba bun. Dei ha ka por U Kaisar Nero ba la pyntreikam ruh ia ka shap bad dak jingkheiῆ 666. Ki nongshong shnong ka Hima Rom ki hap ban pynithuh їalade da kane ka shap bad kine ki dak jingkheiῆ. U Apostol khlem pep u la їohi bad sakhi ia ki jingjia bapher bad kum u nongbud u Jisu Khrist un ym lah shah bad un ym lah satia ban shu long tang u nongpeitkai ia ka jingjynjar sat ki briew hapoh ka jingsynshar kine ki Kaisar runar.
Ka jingpyntreikam U Nero ia ka aiῆ ban shon shap da ki dak jingkheiῆ ia ki nongshong shnong ka їasyriem bad ka “panopticon” jong u Jeremy Bentham u stad pyrkhat ka spah snem ba khatphra. Ka kyntien “panopticon” ka wan na ka ktien “Panoptes” ki Grik hyndai. U Panoptes u dei u ramhah uba don shi spah tylli ki khmat bad da kine ki khmat u peit, u khmih bad u buddien ia ka їaid ka їeng, ka leit ka wan bad ka trei ka ktah jong ki briew kiba shong ha ka Nongbah jong u. Kumta u Jeremy Bentham u mutdur bad ringdur ia ka “panopticon” na kane ka khanatang jong ki Grik bad ka “panopticon” ka dei ka kynja їingbyndi kaba heh bah bad hadpeng ka don ka jingtei kaba jrong tam kaba dei ka їing jong u nongap ne nongpeit syntiat. Une u nongpeit syntiat u lah ban iohi ia baroh ki briew kiba don hapoh kata ka їingbyndi bad ka kamram jong u ka long ba un peit bad syntiat ia ki briew baroh kiba don hapoh kata ka їinbyndi, katba kita kiba don hapoh ka їingbyndi pat kim lah satia ban їohi ia u. Ka “panopticon” u Jeremy Bentham ka shat phalang ia ka jinglong ki bor synshar kiba synshar lahduh, kine ki bor ki pynlut ka bor, ka por bad ka pisa ban syntiat ia ki briew shano ki їaid? Ki kren, ki pyrkhat aїu? Ki trei ki ktah aїu? Badno ki їakren? Ki thoh aїu? Bad kumta ter ter. Ka stad technology mynta ka la kham plielad bad pynlah shuh shuh ia kiba donbor ban buddien bad syntiat ia ki nongshong shnong bad kane ka dei ka jingma kaba khraw kaba ktah ia ka jinglaitluid bad ia ka jingim hi.
Ha shuwa ban long u Apostol, u Paul dei u riewshitniam ba shyrkhei tam bad u dei uta U Saul jong ka Tarsus uba ju pynshitom beiῆ ia ki nongbud u Jisu Khrist, hynrei ha ka lynti sha Damascus la pynwandur thymmai ia ka jingim jong u. Kaei pat kaba pynlong ia u Saul ka Tarsus ban jied ia ka lynti u Trai Jisu?
Khlem artatien u Paul u їohi ba u Jisu u long ka sur Blei hangne ha pyrthei bad kane ka sur ka dei ka sur kaba kyang na ka bynta ki rangli, ki juki. Bad kane ka sur ka khring ia u Paul sha u Jisu.
Kaba ar, kaba khring ia u Paul sha u Jisu ka dei ka jingim ba dap kyrhai bad ka jinglaitluid. Kine ki dei ki ar tylli ki nongrim ba kongsan jong ka Kynhun Bathymmai ne ka Balang. Ka jingim ba dap kyrhai ka dei ka jingim ba pura bad kaba biang nadong shadong, ka imlang sahlang ka bym lah shilliang bad ka bym don ki kynroh kiba pynїapher bad ki lhuh kiba pynїakhlad. Ka jingim ba dap kyrhai lah ban ioh ha ka pyrthei kaba laitluid, ym ha ka “panopticon” u Jeremy Bentham. Ka jinglaitluid ka mut ba u ne ka briew ki lah ban im kumba ki dei hok ban im. Ki lah ban pyrkhat bad kren laitluid khlem ka jingsheptieng. Ban їaid ban їeng bad ban trei ban ktah da ka jingshngaiῆ.
Ka jingieit bad jingaiei ki dei ka thymmei saiῆpyrkhat jong ka Kynhun Bathymmai ne ka Balang bad kine ki khring bad ksoh ia ka jingim u Paul baroh shirynїeng. Ka jingieit ka dei kaba khraw tam ha ka saiῆpyrkhat theoloji u Paul- “…nalor ka jingngeit bad jingkyrmen, ka jingieit ka dei kaba khraw tam.” (I Korinth 13). Kumjuh ruh ka jingaiei bad katkum u Apostol Paul ka jingaiei kam dei kaba tat dor, ka jingaiei u Jisu ka mih na ka mynsiem їatiplem bad ka dei ka sur kaba kyang jam na ka bynta kiba pang bakhrew, na ka bynta kiba tlotbor bad kiba shah kyntait. Kane ka jingaiei ka la їeng bad їada ia ka Nongsamaria, ka la pynkhiah ia ka riewkynthei kaba pang mihsnam khatar snem lynter. Ka jingaiei ka la tyrsuh bad pynduh thiah ia u Sakhaїos bad u Nikodemos haduh ba kin kylla kaba mut.
U Paul u phla, “ba la jied bad khot ia u ban bteng bad їalap ia ka khubor babha” (Rom 1:1). Kumta ia u Apostol, “ban im ka long u Khrist bad ban їap ka long ka jin gmyntoi” (Philippi 1:21)
Amen
Be First to Comment